برہان وانی کی موت کے بعد خونریزی تاحال جاری، درجنوں ہلاکتیں

بھارت کے زیر انتظام کشمیر میں سری نگر سے بدھ تیرہ جولائی کے روز موصولہ نیوز ایجنسی ایسوسی ایٹڈ پریس کی رپورٹوں میں بتایا گیا ہے کہ گزشتہ ہفتے جب بھارتی سکیورٹی دستوں نے نوجوان کشمیری عسکریت پسند رہنما برہان وانی کی ایک مسلح جھڑپ میں ہلاکت کا اعلان کیا تھا، تو اس موت کو حکام نے عسکریت پسندوں کے خلاف اپنی جنگ میں ایک بڑی کامیابی کا نام دیا تھا۔

ایسوسی ایٹڈ پریس کے مطابق یہ بات واضح ہو چکی ہے کہ بھارتی سکیورٹی فورسز کو کشمیری باغیوں کے خلاف اپنی ’کامیابی‘ کے اس اعلان پر اس ردعمل کی قطعاﹰ کوئی توقع ہی نہیں تھی، جو انہیں دیکھنے کو ملا اور اب تک نظر آ رہا ہے۔

برہان وانی کی موت پر کشمیری عوام انتہائی حد تک طیش میں آ گئے، ہر روز مظاہرے ہو رہے ہیں، کشمیر میں کئی مقامات پر بھارتی دستوں کو کرفیو لگانا پڑا اور اب تک خونریزی کی یہ نئی لہر سڑکوں پر درجنوں ہلاکتوں اور سینکڑوں افراد کے زخمی ہونے کی وجہ بن چکی ہے۔

اکیس سالہ برہان وانی مسلح کشمیری باغیوں کی تنظیم حزب المجاہدین کے اعلیٰ ترین کمانڈروں میں سے ایک تھا، جو بھارتی حکمرانی کے مخالف کشمیریوں کی نوجوان نسل میں بہت مقبول تھا اور جس کی موت کے خلاف احتجاج کرتے ہوئے ہزارہا کشمیری مظاہرین وادی کے مختلف شہروں اور قصبوں کی سڑکوں پر نکل آئے اور ایک بار پھر ان کا بلند آواز مطالبہ تھا: بھارتی حکمرانی سے ’آزادی‘۔

نو جولائی گزشتہ ہفتے کے روز شروع ہونے والے ان مظاہروں اور کشمیری مظاہرین کی بھارتی سکیورٹی دستوں کے ساتھ جھڑپوں میں کم از کم بھی تیس افراد مارے جا چکے ہیں۔ ان میں چند سکیورٹی اہلکار بھی شامل ہیں لیکن دو درجن سے بھی زائد ہلاک شدگان عام کشمیری مظاہرین تھے۔ اس کے علاوہ زخمیوں کی تعداد بھی کم از کم تین چار سو تک بتائی جا رہی ہے، جن کے مقامی ہسپتالوں میں علاج کے لیے بستر بھی کم پڑ چکے ہیں۔

ایسوسی ایٹڈ پریس نے لکھا ہے کہ رواں ہفتے کے دوران اب تک ہر روز پتھراؤ کرنے والے نوجوان کشمیری مظاہرین کے احتجاج میں صرف تیزی ہی آئی ہے اور مطاہرین کو کرفیو کی بھی کوئی پرواہ نہیں جبکہ بھارتی دستوں کی طرف سے ان کے خلاف فائرنگ کے علاوہ آنسو گیس بھی استعمال کی جا رہی ہے۔

اس بارے میں بھارتی حکام میں اب یہ سوچ بھی پائی جاتی ہے کہ وہ برہان وانی کی موت کے ساتھ نادانستہ طور پر ایک ایسی بغاوت کو دوبارہ ہوا دے بیٹھے ہیں، جسے کنٹرول کرنا بہت مشکل بھی ہو سکتا ہے۔ کشمیر میں مسلح بغاوت کے خلاف عسکری کارروائیوں میں شریک ایک اعلیٰ بھارتی سکیورٹی اہلکار نے تو اپنی شناخت ظاہر نہ کرنے کی شرط پر یہ اعتراف بھی کیا، ’’ہم اتنے شدید عوامی ردعمل کی توقع نہیں کر رہے تھے۔ یہ بات پریشان کن ہے۔‘‘

اس موضوع پر اپنے تفصیلی مراسلوں میں متعدد خبر رساں اداروں نے یہ بھی لکھا ہے کہ برہان وانی کشمیری عسکریت پسندوں کے سب سے بڑے گروپ کا ایک ایسا رہنما تھا، جس کی ہلاکت سے پہلے بھی ایسے واضح اشارے موجود تھے کہ اس مسلم اکثریتی خطے میں ایک نئی بغاوت کے لیے فضا تیار ہو چکی ہے۔

بہت سے کشمیریوں کی جذباتی حالت اس وقت یہ ہے کہ جیسے وہ برہان وانی کو ذاتی طور پر جانتے تھے۔ ایسی صورت میں کئی تجزیہ نگار ایک سے زائد مرتبہ یہ بھی کہہ چکے ہیں کہ ’زندہ برہان وانی کے مقابلے میں یہ کشمیری باغی رہنما اپنی ہلاکت کے بعد اور بھی زیادہ خطرناک ثابت ہو سکتا ہے‘۔