بظاہر خود کو مارنے والا شخص خطرہ تھا، نیوزی لینڈ پولیس

نیوزی لینڈ کی پولیس نے آج بدھ کو بتایا کہ چون سالہ آرٹمنی ڈوبووسکیو کا مساجد پر حملے کرنے والے کے ساتھ براہ راست کوئی تعلق نہیں تھا۔ ڈوبووسکیو کو ٹروئے کے نام سے بھی جانا جاتا تھا۔

پولیس کمانڈر جان پرائس کے مطابق ڈوبووسکیو کے حوالے سے پولیس اس وقت چوکنا ہوئی، جب اس نے پندرہ مارچ کے حملے کے بارے میں کچھ عجیب و غریب سی ای میلز کیں۔ ان کے بقول کچھ اطلاعات کی بنیاد پر پولیس نے اس کے تین گھروں کی تلاشی لی اور وہاں سے ملنے والے ہتھیار اور انتہائی شدت پسند مواد قبضے میں لے لیا۔

 اس کے بعد ستائیس مارچ کے دن مقامی وقت کے مطابق ساڑھے بارہ بجے پولیس نے آرٹمنی ڈوبووسکیو کو ایک گاڑی میں سفر کرنے کے دوران روکا۔ اس کے بعد تین گھنٹوں پولیس کے ساتھ اس کی بات چیت جاری رہی۔ تاہم حکام کے بقول گاڑی تک پہنچنے سے قبل ہی اس نے خود کو چاقو سے زخمی کر لیا تھا۔ پولیس کو اس کی گاڑی سے ایک خنجر بھی ملا تھا۔

کمانڈر جان پرائس کے بقول چھاپوں کے دوران ملنے والے ہتھیاروں اور مشتبہ شخص کے ساتھ ہونے والی بات چیت سے پولیس اس نتیجے پر پہنچی ہے کہ ڈوبووسکیو کمیونٹی کے لیے خطرے کا باعث تھا۔ انہوں نے مزید کہا کہ فی الحال وہ اس خطرے کی نوعیت کو بیان نہیں کر سکتے۔

 ڈوبووسکیو کے والد نے اپنے ایک انٹرویو میں کہا کہ ان کا بیٹا 1997ء میں روس سے نیوزی لینڈ آیا تھا۔ ان کے بقول وہ ہتھیاروں اور عسکری تاریخ میں جنون کی حد تک دلچسپی  رکھتا تھا اور اس نے نازی دور کی یادگاریں بھی اکھٹی کی ہوئی تھیں،’’میرے بیٹے کو چیزیں جمع کرنے کا شوق تھا۔ اس نے کبھی بھی ہتھیاروں کو استعمال کرنے کی بات نہیں کی۔‘‘ اطلاعات کے مطابق  ڈوبووسکیو ماضی میں بھی متعدد جرائم کا ارتکاب کر چکا تھا۔