بھارت نے کشمیر میں اسمبلی انتخابات کا اعلان کر دیا

بھارت نے اپنے زیر انتظام جموںکشمیر میں اٹھارہ ستمبر کو اسمبلی انتخابات کرانے کا اعلان کیا ہے۔ یہ انتخابی عمل تین مرحلوں پر مشتمل ہو گا۔ چیف الیکشن کمشنر راجیو کمار نے آج بروز جمعہ نئی دہلی میں  نامہ نگاروں کو بتایا، ''ایک طویل وقفے کے بعد جموں و کشمیر میں انتخابات ہوں گے۔‘‘

2019ء میں وزیر اعظم نریندر مودی کی طرف سے اپنے زیر انتظام اس مسلم اکثریتی علاقے سے اس کی نیم خود مختار حیثیت چھینے جانے کے بعد سے یہ پہلا موقع ہے کہ اس متنازعہ علاقے میں انتخابات ہو رہے ہیں۔ مودی حکومت کی ان تبدیلیوں کے تناظر میں کشمیر کو نئی دہلی کے مقرر کردہ ایڈمنسٹریٹر کے ذریعے چلایا جاتا رہا ہے اور اس کی نگرانی بیوروکریٹس کرتے ہیں، جن کا کوئی عوامی مینڈیٹ نہیں ہے۔

ووٹنگ کے عمل کی نگرانی کے لیے فوج

یکم اکتوبر تک جاری رہنے والے ان انتخابات کی نگرانی کے لیے دسیوں ہزار بھارتی فوجی تعینات کیے جائیں گے۔ انتخابی کمیشن کے مطابق کل 8.7 ملین افراد ووٹ ڈالنے کے اہل ہوں گے اور ووٹوں کی گنتی چار اکتوبر کو ہوگی اور اسی دن نتائج کا اعلان کیے جانے کا امکان ہے۔

قانون سازی پر بہت کم اخیتار

اس علاقائی اسمبلی کو تعلیم اور ثقافت پر صرف برائے نام کنٹرول کے ساتھ  قانون سازی کے کچھ اختیارات حاصل ہوں گے۔ تاہم مقامی سیاست دانوں نے علاقے کی ریاستی حثیت کی جلد از جلد بحالی کا مطالبہ کیا ہے تاکہ قانون سازی کے مکمل اختیارات مقامی اسمبلی کو واپس کیے جا سکیں۔

ش ر⁄  ع ت (اے پی، اے ایف پی، روئٹرز)