'تارکین وطن کا ملک‘ بننے سے بچاؤ، ہنگری مزید کیا کرے گا؟

ہنگیرین پارلیمان میں پیش کیا جانے والا یہ مجوزہ قانون اگر منظور ہو جاتا ہے تو اس کی رُو سے غیر قانونی مہاجرت کو فروغ دینا اور اس میں سہولت فراہم کرنا جرم قرار دے دیا جائے گا اور اس کی سزا ایک سال تک کی جیل ہو سکتی ہے۔

اس حوالے سے ہنگری کی حکومت کی جانب سے چلائی جانے والی’سٹاپ سوروس‘ نامی اس مہم کا ہدف بنیادی طور پر سماجی تنظیمیں ہیں۔ ان میں سے بعض کی مالی اعانت ہنگیرین امریکن سرمایہ کار جارج سوروس کی جانب سے کی جاتی ہے۔ اس امداد میں مہاجرین کے لیے قانونی اور دوسری معاونت شامل ہے۔

ہنگری کے وزیر اعظم وکٹور اوربان کی مہاجرین مخالف حکومت کی نظر میں اس حوالے سے بدنام گروپ، ہیلسنکی کمیٹی برائے مہاجرین کا کہنا ہے کہ اس کی سرگرمیاں قانون کے مطابق ہیں۔ نیز یہ کہ ایک جمہوری ملک میں ایسا مجوزہ قانون قابل قبول نہیں ہے۔

گروپ کے مطابق،’’یہ مجوزہ قانونی بل ایسے افراد کو سزا کی دھمکی دیتا ہے، جو ہنگری میں انسانی حقوق کی پاسداری کے لیے قانونی حد میں رہتے ہوئے کام کر رہے ہیں۔‘‘

مہاجرین اور تارکین وطن کے حوالے سے ہنگری کی حکومت نے آئین میں جو ترامیم تجویز کی ہیں اُن کے مطابق ہنگری میں غیر ملکیوں کی آباد کاری ممکن نہیں ہو گی اور ملک میں سیاسی پناہ کے حصول کی اہلیت کی شرائط بھی مزید سخت کر دی جائیں گی۔

مثال کے طور پر اگر مہاجرین کسی ایسے ملک سے گزرتے ہوئے ہنگری میں داخل ہوئے ہیں، جہاں اُنہیں تشدد اور پریشانی کا سامنا نہیں کرنا پڑا،  تو وہ ہنگری میں پناہ کے حقدار نہیں ہوں گے۔

چونکہ ایشیا اور مشرق وسطیٰ سے آنے والے بیشتر مہاجرین سربیا سے گزر کر ہنگری پہنچتے ہیں لہذٰا اُن کے لیے اس نئی شرط کو پورا کرنا مشکل ہو جائے گا۔

اقوام متحدہ کی ایجنسی برائے مہاجرین نے ہنگری سے یہ قانون سازی نہ کرنے کو کہا ہے۔

ہنگری نے گزشتہ برس کئی بار سوروس پر ’اندھا دھند یورپ کی طرف آنے والے پناہ گزینوں کی مدد‘ کا الزام عائد کرتے ہوئے اُن کے خلاف مہم چلائی ہے۔ تاہم منگل مورخہ انتیس مئی کو پیرس میں اپنے ایک بیان میں جارج سوروس نے ایک بار پھر بوڈاپیسٹ حکومت کے ان الزامات کو مسترد کیا ہے۔ 

ص ح/ اے پی