’تجارتی جنگ کے اثرات‘ آئی ایم ایف کی پیشن گوئیوں میں تبدیلی

بین الاقوامی مالیاتی فنڈ نے آج منگل نو اکتوبر کو خبردار کیا ہے کہ امریکا اور چین کی جانب سے ایک دوسرے پر عائد کیے جانے والے اضافی محصولات عالمی اقتصادی ترقی پر اثر انداز ہو رہے ہیں۔ اس تناظر میں اس ادارے نے معاشی ترقی کے حوالے سے پہلے سے لگائے گئے اندازے تبدیل کر دیے ہیں۔

آئی ایم ایف کی پیشن گوئی ہے کہ 2018ء اور 2019ء کے دوران عالمی اقتصادی ترقی کی شرح 3.7 فیصد رہنے کا امکان ہے۔ سال رواں کی ابتدا میں یہ شرح 3.9 فیصد رہنے کے اندازے لگائے گئے تھے۔

بین الاقوامی مالیاتی فنڈ کے مطابق عالمی معیشت سست روی کا شکار ہو رہی ہے۔  آئی ایم ایف نے 2019ء کے دوران انیس مختلف ممالک کے حوالے سے لگائے جانے والے اندازوں میں بھی رد و بدل کیا ہے۔ ان میں یورو زون اور ترقی کی جانب گامزن کچھ ممالک بھی شامل ہیں۔

عالمی تجارت میں تناؤ کی کیفیت کی وجہ سے یورو زون میں بھی رواں برس اقتصادی ترقی کی شرح  کو 2.2 سے کم کر کے 2  فیصد کر دیا گیا ہے۔

 آئی ایم ایف کے مطابق برطانیہ کے یورپی یونین سے انخلاء کے حوالے سے  جاری مذاکرات میں تعطل بھی معاشی صورتحال پر اثر انداز ہو رہا ہے۔ یہی صورتحال جرمن معیشت کی بھی ہے جس کے لیے آئی ایم ایف نے رواں برس اور آئندہ برس شرح نمو کا اندازہ 1.6 فیصد لگایا ہے۔ جرمن معیشت کی شرح نمو میں اس کمی کی وجوہات برآمدات اور صنعتی پیدوار میں ہوتی ہوئی کمی کو قرار دیا گیا ہے۔