ترک ثقافت کے رنگوں سے سجا، گرینڈ ٹرکش فیسٹیول

فیسٹیول کا انعقاد ترکی کے قونصلیٹ، ترکش ایئر لائن، ایس ٹی ایم انرجی اور زورلو انرجی کے تعاون سے کیا جا رہا ہے۔

فیسٹیول میں پورے پورٹ گرینڈ کو ترکی کی ثقافت کے مطابق سجایا گیا ہے۔ ترک پکوان اور موسیقی کے علاوہ ترکی کے خاص لیمپ، جیولری، کیلیگرافی اور دیگر سوغاتوں کے اسٹالز بھی لگائے گئے ہیں۔

ہفتہ 19 فروری کی شام منعقد ہونے والی فیسٹول کی افتتاحی تقریب کے موقع پر ترک قونصل جنرل کے علاوہ متحدہ قومی مومنٹ کے رہنما وسیم اختر نے بھی شرکت کی۔

اپنی نوعیت کےاس پہلے فیسٹیول میں ترکش کھانوں، شاپنگ، موسیقی اور انٹرٹینمنٹ سے لطف اندوز ہونے کے لیے کراچی کے عوام رات گئے تک شرکت کر سکتے ہیں۔

ترک قونصل جنرل کے مطابق ثقافتی ورثے کی ترویج اور باہمی رشتوں کو فروغ دینے کے لیے ترکی قونصلیٹ نے ملک کے دوسرے اہم اداروں کے تعاون سے کراچی پورٹ گرینڈ میں اس فیسٹیول انعقاد کیا ہے۔

فیسٹیول کے انعقاد سے ترکی کی ثقافت اور سیاحت کو اجاگر کرنا اور پاکستان اور ترکی کے عوام کے درمیان رابطوں اور ثقافتی تعلق کی ترویج جیسے مقاصد حاصل کرنے کی امید کی جا رہی ہے۔

ٹرکش گرینڈ فیسٹیول میں شرکت کے لیے ترکی سے بڑی تعداد میں آرٹسٹ،پرفارمرز اور پکوان کے ماہرین پاکستان آئے ہیں۔

فیسٹیول میں پیش کی جانے والی تمام پرفارمنس ترک قونصلٹ کے زیر انتظام ہیں جس میں معروف پاکستانی میوزک بینڈ ’فیوژن‘ کی پرفارمنس بھی شامل ہے۔

ترکی سے آنے والے فنکاروں میں ’سلطنت میوزک‘ نامی گروپ کی روایتی موسیقی کے آلات پر پیش کی جانے والی پرفارمنس کو لوگوں کی طرف سے خوب سراہا جا رہا ہے۔

اس تین روزہ میلے میں تقریباً 100 اسٹالز قائم کیے گئے ہیں جبکہ ترک موسیقی کے 60 سے زائد شو بھی منعقد کیے جا رہے ہیں جس میں عوام لائیو پرفارمنس سے لطف اندوز ہو سکتے ہیں۔

19 سے 21 فروری تک جاری رہنے والے گرینڈ ٹرکش فیسٹیول میں شام پانچ بجے کے بعد سے 500 روپے انٹری فیس کے ساتھ شرکت کی جا سکتی ہے۔