تھائی فوج کے سربراہ ملک کے وزیر اعظم بن سکتے ہیں

تھائی لینڈ کے فوجی ذرائع نے اس بارے میں آج بُدھ کو عندیہ دیا کہ اس فوج کے زیر اثر نیشنل اسمبلی کی طرف سے آرمی چیف جنرل پرایُت چان اوچا کو ملک کا وزیر اعظم منتخب کیا جا سکتا ہے۔

ذرائع نے خبر رساں ایجنسی اے ایف پی کو بتایا ہے کہ جمعرات کو تھائی لینڈ کی 179 اراکین پر مشتمل قومی اسمبلی کا اجلاس ہو گا جس میں نئے سربراہ حکومت کا انتخاب کیا جائے گا۔ انہوں نے توقع ظاہر کی ہے کہ آرمی کے سربراہ جنرل پرایُت چان اوچا واحد امیدوار ہو سکتے ہیں۔

نام ظاہر نہ کرنے کی شرط پر دیے گئے ایک بیان میں تھائی فوج کے ایک اہلکار نے کہا، " وزیر اعظم کے عہدے کے لیے جنرل پرایُت چان اوچا کے سوا کوئی دوسرا موزوں امیدوار موجود ہی نہیں۔"

اس فوجی اہلکار کا مزید کہنا تھا کہ جنرل پرایُت چان اوچا نے حکومت کا تختہ گرایا ہے اور تمام تر مسائل کا حل بھی انہی کی ذمہ داری بنتی ہے۔ وزیر اعظم بننے کے بعد ان کے پاس تمام تر اختیارات ہوں گے۔

تھائی لینڈ کی فوج کے ایک اور اہلکار کا کہنا ہے، " جنرل پرایُت چان اوچا کو اس لیے نامزد کیا گیا ہے کہ وہ وزیر اعظم کے عہدے کے لیے نہایت موزوں شخصیت ہیں۔" اس فوجی اہلکار نے بھی نام مخفی رکھنے کی شرط پر مزید کہا کہ رائے عامہ کے مطابق جنرل پرایُت چان اوچا عوام میں بھی مقبول ہیں اور تھائی لینڈ کے باشندے نیشنل کونسل فار پیس اینڈ آرڈر این سی پی او کے کاموں کو سراہتے ہیں۔"

سابق وزیر اعظم ینگ لک شناوترا کی ایک متنازعہ عدالتی فیصلے کے بعد وزیر اعظم کے عہدے سے بر طرفی کے بعد جنرل پرایُت چان اوچا نے 22 مئی کو تھائی لینڈ کی ایک منتخب حکومت کو اقتدار سے علیحدہ کر دیا تھا۔ یہ عمل پرامن رہا تھا۔

تھائی لینڈ میں سیاسی انتشار 2006 ء میں اس وقت سے چلا آرہا ہے جب ینگ لک شناواترا کے بڑے بھائی اور ایک کروڑ پتی ٹیلیکوم ٹائی کون تھاکسن شناواترا کی حکومت کا تختہ الٹا تھا۔ تھائی فوجی حکمرانوں کا کہنا ہے کہ وہ ملک میں آئندہ برس کے عام انتخابات سے پہلے ملک میں سیاسی اصلاحات متعارف کروانا چاہتے ہیں۔ ان کا کہنا ہے کہ اقتدار کو ہاتھ میں لینا ان کے لیے اس لیے ناگزیر تھا کیونکہ ملک قریب ایک ماہ سے سیاسی بحران کا شکار تھا اور اُس سے متعلق سڑکوں پر ہونے والے تشدد کے واقعات میں 30 افراد ہلاک ہو چکے تھے اور حکومت مفلوج ہو کر رہ گئی تھی۔