جان اور جواد نے تاریخ رقم کر دی

ویانا میں جوہری مذاکرات کی کامیابی کے بعد بنائی جانے والی تصاویر میں دبلے پتلے طویل القامت امریکی سیکرٹری آف اسٹیٹ جان کیری کو ان کے مہنگے سوٹ میں جب کہ ان کے ایرانی ہم منصب جواد ظریف کو، جو ان سے قد میں چھوٹے اور فربہ ہیں، کالر کے بغیر والی اپنی روایتی شرٹ پہنے ہوئے دیکھا جا سکتا ہے۔ کئی مہینوں سے جاری اس بہت نازک مذاکراتی عمل کے دوران کبھی ان دونوں نے خود کو فولاد کی طرح مضبوط ظاہر کیا اور کبھی یہ ایک دوسرے کے چالاک حریف دکھائی دیے۔

جوہری مذاکرات کے دوران سائیکلنگ کے ایک حادثے میں کیری کی ایک ٹانگ کی ہڈی بھی ٹوٹ گئی تھی لیکن یہ ٹوٹی ہوئی ہڈی بھی ان کی رفتار کو کم نہ کر سکی۔ مذاکراتی عمل کے دوران ان دنوں کے مابین اتنی بے تکلفی ہو چکی ہے کہ اب یہ ایک دوسرے کو جان اور جواد کہہ کر پکارتے ہیں۔ کبھی کبھار یہ دونوں ایک دوسرے سے لطیفوں کا تبادلہ بھی کرتے ہیں تاہم اس کے باوجود ان کے مابین عزت و احترام کا رشتہ بھی قائم ہے۔

ماہرین کے مطابق جان کیری اور جواد ظریف ایران کے جوہری پروگرام کے حوالے سے بڑھنے والے خدشات کو صحیح وقت پر دور کرنے کے لیے بالکل صحیح انتخاب تھے۔ اب تو یہ بھی کہا جا رہا ہے کہ ان دونوں کو نوبل کے امن انعام کے لیے بھی نامزد کیا جا سکتا ہے۔

55 سالہ جواد ظریف کو ایرانی صدر حسن روحانی نے ستمبر 2013ء میں وزیر خارجہ بنایا تھا اور انہیں ایران پر عائد اقتصادی پابندیوں کے فوری خاتمے اور جوہری تنازعے کو حل کرنے کی ذمہ داری سونپی گئی تھی۔ وہ روانی سے انگریزی بولتے ہیں اور انہوں نے امریکا میں ڈینوَر سے بین الاقوامی قانون کے شعبے میں ڈاکٹر کی ڈگری لے رکھی ہے۔

دوسری جانب جان کیری کے لیے تقریباً دو سال تک جاری رہنے والے مذاکرات کا نتیجہ خیز ہونا ا ایک ایسی تاریخ ساز فتح ہے، جس کے اثرات مستقبل میں بھی نقش ہوتے چلے جائیں گے۔ 71 سالہ کیری عقیدے کے اعتبار سے کیتھولک مسیحی ہیں۔ گزشتہ برس مشرق وسطٰی میں قیام امن کی کوششوں میں ناکامی کے بعد کیری کی سفارت کاری کی یہ ایک بڑی فتح ہے۔ ایرانی امور کی ایک امریکی ماہر سوزانا مالونی کے مطابق، ’’دو پرانے مخالفین کے مابین معاہدے کا طے پانا ایک نجی اور پیشہ ورانہ فتح ہے۔‘‘