جرمنی: پائلٹ ہڑتال پر، پروازیں منسوخ

یہ ہڑتال اس فضائی کمپنی کی تاریخ کی سب سے بڑی ہڑتال ہے۔ لفتھانزا نے اعلان کیا ہے کہ بدھ اور جمعے کے درمیان 3800 پروازیں منسوخ کر دی گئی ہیں اور یہ کہ اس اقدام سے چار لاکھ پچیس ہزار مسافر متاثر ہوں گے۔ اس ہڑتال کے اثرات خاص طور پر یورپ کے تیسرے بڑے ہوائی اڈے فرینکفرٹ پر نظر آ رہے ہیں۔

جرمنی میں پائلٹوں کا شمار سب سے زیادہ آمدنی والے طبقے میں ہوتا ہے اور وہ دیگر ملازمت پیشہ افراد کے مقابلے میں ریٹائر بھی جلد ہو سکتے ہیں۔ تازہ ہڑتال کا مقصد انہی سہولتوں کو برقرار رکھنا ہے۔ ساتھ ساتھ پائلٹ اپنی تنخواہوں میں پانچ فیصد سے زیادہ اضافے کا مطالبہ کر رہے ہیں۔

لفتھانزا کے ارکان کی تعداد ایک لاکھ سترہ ہزار ہے اور اگرچہ ان میں سے صرف 5400 ہی ہڑتال پر ہیں لیکن اس ہڑتال نے پروازوں کا پورا نظام درہم برہم کر دیا ہے۔ تنخواہوں سے متعلقہ امور کے ایک ماہر ہاگن لیش نے ڈوئچے ویلے سے باتیں کرتے ہوئے کہا کہ ’اپنے حجم کے اعتبار سے یہ اپنی نوعیت کی منفرد ہڑتال ہے، اس سے پہلے پائلٹوں نے کبھی بھی مسلسل تین روز تک کام نہیں چھوڑا۔ پائلٹ اتنے بڑے پیمانے پر ہڑتال کر رہے ہیں کہ جس سے اس ادارے کو بے پناہ نقصان ہو رہا ہے‘۔

پائلٹوں کی یونین ’کاک پِٹ‘ بڑی بھی ہے اور طاقتور بھی۔ ان کی تنخواہیں اور انہیں حاصل مراعات بھی بہت زیادہ ہیں۔ پائلٹوں کو ابتدا ہی میں تقریباً ستر ہزار یورو سالانہ تنخواہ ملنے لگتی ہے جبکہ آگے چل کر پائلٹ سال میں دو لاکھ پچپن ہزار یورو تک بھی کما لیتے ہیں۔ پائلٹ پچپن سال ہی کی عمر میں ریٹائر بھی ہو جاتے ہیں۔

’کاک پِٹ‘ کے نمائندے مارکوس واہل کے مطابق مسلسل بدلتے اوقات اور طویل دورانیوں کی وجہ سے پائلٹوں کا کام بہت تھکا دینے والا ہوتا ہے:’’جب کوئی پائلٹ یہ کہتا ہے کہ وہ مزید یہ کام نہیں کر سکتا کیونکہ یہ نڈھال کر دینے والا ہے اور اگر وہ کوئی ہوائی جہاز چلائے گا تو وہ محفوظ نہیں ہو گا تو پھر اُس پائلٹ کو یہ سہولت ہونی چاہیے کہ وہ خود اپنی ریٹائرمنٹ کا وقت متعین کرے۔‘‘

پائلٹوں کی ہڑتال کی بنیادی وجہ لفتھانزا گروپ کے وہ نئے منصوبے ہیں، جن کا مقصد اس امر کو یقینی بنانا ہے کہ پائلٹ، جو اب اوسطاً اٹھاون سال کی عمر میں پنشن پر جاتے ہیں، کم از کم ساٹھ سال کی عمر میں ریٹائر ہوں۔ واضح رہے کہ جرمنی میں دیگر پیشوں میں اب یہ ایک معمول کی بات ہے کہ لوگ زیادہ بڑی عمر تک کام کرتے ہیں اور انہیں پنشن بھی کم ملتی ہے۔ مختلف جرمن اخبارات کے تبصروں میں جرمن قومی فضائی کمپنی کے پائلٹوں کو، جن کی ننانوے فیصد تعداد نے ہڑتال کی حمایت کی تھی، ہدفِ تنقید بنایا جا رہا ہے۔