دوسری عالمی جنگ کے بعد مصالحت: ایلیزے ٹریٹی کے ساٹھ سال

دوسری عالمی جنگ کے دوران نازی جرمنی نے فرانس پر بھی قبضہ کر لیا تھا۔ جنگ کے خاتمے کے 18 سال بعد اس دور کے وفاقی جرمن چانسلر کونراڈ آڈےناؤر اور فرانسیسی صدر چارلس ڈیگال نے دونوں ممالک کے مابین ماضی کی تلخیوں کو بھلا کر مصالحت اور قریبی تعاون کو یقینی بنانے والے جس معاہدے پر دستخط کیے تھے، وہ 'ایلیزے ٹریٹی‘ کہلاتا ہے۔

جرمن فرانسیسی تعلقات نوجوانوں کی نظر میں، ایک دلچسپ سروے

اس معاہدے پر دستخط 1963ء میں  کیے گئے تھے اور آج اس کے 60 برس پورے ہو جانے کے موقع پر موجودہ جرمن چانسلر اولاف شولس پیرس میں فرانسیسی صدر ایمانوئل ماکروں کے مہمان تھے۔

ان دونوں رہنماؤں نے اس موقع پر اپنی تقریروں میں ایک بار پھر اس عزم کا اعادہ کیا کہ جرمنی اور فرانس، جو یورپی یونین کی بڑی معیشتیں ہیں اور مشترکہ طور پر یورپی اتحاد کے عمل کا انجن بھی کہلاتے ہیں، یورپی مستقبل کی تعمیر و تشکیل کے لیے مل کر کام کرتے رہیں گے۔

صدر ماکروں کا خطاب

اس موقع پر دونوں ہمسایہ ممالک کے قومی پارلیمانی اداروں کی ایک مشترکہ تقریب بھی ہوئی۔ اس تقریب سے خطاب کرتے ہوئے فرانسیسی صدر ماکروں نے کہا، ''اپنی مشترکہ کوششوں کو آگے بڑھاتے ہوئے ہمارے دونوں ممالک کو مل کر ابھی اور بہت سا کام کرنا ہے تاکہ ہم زیادہ خود مختار، زیادہ متحدہ اور زیادہ جمہوری یورپ کی تشکیل کو یقینی بنا سکیں۔‘‘

یورپی یونین کی ششماہی صدارت اب سویڈن نے سنبھال لی

پیرس ميں منعقدہ تقریب سے اپنے خطاب میں فرانسیسی صدر نے برلن اور پیرس کے مابین اب عشروں پر محیط انتہائی قریبی نوعیت کے تعاون اور افہام و تفہیم کا ذکر کرتے ہوئے کہا، ''آج کسی بھی فرانسیسی کے لیے جرمنی کا ذکر کرنا ایسا ہی ہے جیسے وہ اپنی ہی ذات کے ایک حصے کے بارے میں بات کر رہا ہو۔‘‘

صدر ماکروں کے الفاظ میں، ''آج کا فرانس اور جرمنی ایسے ہی ہیں، جیسے ایک ہی سینے میں دو دل، آج ہماری حیثیت بالکل ایسی ہی ہے۔‘‘

کروشیا نے یورو کو اپنی کرنسی کے طور پر اپنا لیا

چانسلر شولس کا فرانسیسی میں جواب

صدر ماکروں کی تقریر کے جواب میں جرمن چانسلر شولس نے اس تقریب سے خطاب کرتے ہوئے فرانسیسی صدر کا شکریہ ادا کیا اور کہا، ''بہت شکریہ، جناب صدر! میں اپنے دل کی گہرائیوں سے آپ کا شکر گزار ہوں۔‘‘ چانسلر شولس نے صدر ماکروں کو مخاطب کرتے ہوئے یہ الفاظ دوستی اور قربت کے جذبات کے اظہار کے طور پر فرانسیسی زبان میں کہے۔

یورپی یونین کے سالانہ بجٹ میں جرمنی کا حصہ: ریکارڈ پچیس بلین یورو

چانسلر شولس نے کہا، ''میں صرف آپ کا ہی نہیں، بلکہ اس دوستی کے لیے اپنے تمام فرانسیسی بھائیوں اور بہنوں کا بھی شکر گزار ہوں۔‘‘

اولاف شولس کے مطابق، ''یورپ کو زیادہ سے زیادہ خود مختار بنانے کی ضرورت ہے اور جرمنی اور فرانس دونوں ہی مل کر اس مقصد کے لیے مصروف عمل ہیں۔‘‘

م م / ع س (ڈی پی اے، اے ایف پی)