روسی صدر پوٹن سرکاری دورے پر بھارت میں

ولادیمیر پوٹن یوں تو سالانہ بھارتی روسی سربراہی کانفرنس میں شرکت کے لیے آ رہے ہیں لیکن متعدد ملکوں کی نگاہیں ان کے اس دورے پر لگی رہیں گی۔ دونوں ممالک اس دوران پندرہ تا بیس معاہدوں پر دستخط کر سکتے ہیں۔ ان میں ایٹمی توانائی اور دفاعی تعاون میں اضافے سے لے کر ہیروں کی تجارت تک کے معاہدے شامل ہوں گے۔ نریندر مودی حکومت نے پوٹن کے اس دورے کو باہمی تعلقات میں ایک سنگ میل قرار دیا ہے۔

بھارتی وزارت خارجہ کے جوائنٹ سیکرٹری اجے بساریا کے مطابق وزیر اعظم مودی روس کے ساتھ تعلقات کو اپنی خارجہ پالیسی کا اہم ترین حصہ سمجھتے ہیں۔ وہ ماضی میں گجرات کے وزیر اعلیٰ کے طور پر روس کے تین دورے کر چکے ہیں۔ اجے بساریا نے ڈی ڈبلیو کو بتایا، ’’ روس دفاع، جوہری توانائی، سائنس اور خلاء جیسے اسٹریٹیجک سیکٹرز میں بھارت کا اہم پارٹنر ہے۔ وہ دفاع کے شعبے میں بھارت کا بنیادی پارٹنر ہے اور عشروں تک رہے گا۔ ہم ان باہمی تعلقات کو کافی اہمیت دیتے ہیں۔‘‘
اسی دوران روسی صدر نے بھی اپنے ایک انٹرویو میں بھارت کوروس کا ایک معتبر اور آزمودہ دوست قرار دیتے ہوئے ایسے دعووں کی تردید کی کہ دونوں ملکوں کے مابین تعلقات میں کمی آئی ہے۔ صدر پوٹن نے مزید کہا کہ وہ اس دورے کے دوران بھارت میں نئے ایٹمی بجلی گھروں کی تعمیر، سخوئی سپر جیٹ جنگی طیاروں، ایم ایس۔21 طرز کے مسافر بردار طیاروں اور روسی ٹیکنالوجی پر مبنی اسمارٹ سٹی قائم کرنے میں تعاون کی بات کریں گے۔

ولادیمیر پوٹن نے روس اور پاکستان کے درمیان بڑھتے ہوئے دفاعی تعاون پر بعض حلقوں کی تشویش کو بھی بے بنیاد قرار دیا اور کہا کہ ماسکو نے پاکستان کے ساتھ انسداد دہشت گردی اور منشیات کے کاروبار کے خلاف کارروائیوں کو مؤثر بنانے کے طریقہ کار پر بات کی ہے اور اس طرح کے تعاون سے طویل المدتی بنیادوں پر بھارت سمیت خطے کے تمام ملکوں کو فائدہ ہو گا۔
خیال رہے کہ بھارت اپنی دفاعی ضروریات کے لیے اب صرف روس پر انحصار کرنے کے بجائے دیگر ملکوں سے بھی دفاعی ساز و سامان درآمد کرتا ہے تاہم سفارتی لحاظ سے وہ اب بھی روس کو کافی اہمیت دیتا ہے۔ اس کی ایک بڑی وجہ یہ ہے کہ نئی دہلی کا ماسکو کے ساتھ کسی معاملے میں کوئی بڑا اختلاف کبھی نہیں رہا جبکہ سرد جنگ کے زمانے میں ماسکو کشمیر پر بھارت کے موقف کی مسلسل تائید کرتا رہا ہے اور افغانستان، ایران نیز دہشت گردی جیسے بین الاقوامی امور پر بھی دونوں ملکوں کے موقف یکساں ہیں۔

اس کے علاوہ دونوں ممالک عالمی اداروں پر مغرب کے بڑھتے ہوئے غلبے کو بھی ناپسند کرتے ہیں۔ بھارتی وزارت خارجہ کے جوائنٹ سیکرٹر ی اجے بساریا نے کہا، ’’روس اور ہمارے درمیان متعدد اہم عالمی معاملات، بالخصوص مشترکہ پڑوس میں دہشت گردی کے خطرات کے حوالے سے ہمارے نظریات یکساں ہیں۔‘‘ بساریا نے مزید کہنا،’’بھارت نے واضح طور پر کہا ہے کہ وہ روس کے خلاف کسی بھی طرح کی اقتصادی پابندیوں کی حمایت نہیں کرے گا۔‘‘
خیال رہے کہ ولادیمیر پوٹن کا بھارت کا یہ چھٹا دورہ ہے جبکہ وزیر اعظم مودی کے ساتھ یہ ان کی تیسری ملاقات ہوگی۔ پوٹن اپنے ساتھ ایک بڑا تجارتی وفد لے کر آ رہے ہیں اور وہ بھارت میں صنعت و تجارت سے وابستہ اہم افراد سے بھی ملاقات کریں گے۔

اسی دوران امریکا کا کہنا ہے کہ صدر پوٹن کے اس دورے سے جنوری میں صدر اوباما کے دورہ بھارت پر کوئی اثر نہیں پڑے گا اور نئی دہلی اور واشنگٹن کے باہمی تعلقات کا سلسلہ اپنی رفتار سے آگے بڑھتا رہے گا۔