رومانیہ میں ایک پاکستانی سمیت دس مشتبہ انسانی اسمگلر رفتار

رومانیہ میں منظم جرائم اور دہشت گردی کے تفتیش کار ادارے نے بتایا ہے کہ رومانیہ کے نو شہریوں کو رواں ہفتے ملک کے مغربی حصے سے جبکہ پاکستانی باشندے کو آسٹریا سے حراست میں لیا گیا ہے۔

شبہ ہے کہ ان افراد نے سن 2017 میں مارچ سے جون تک کے عرصے میں قبرص، بلغاریہ، سربیا،رومانیہ، ہنگری، آسٹریا، اٹلی،جرمنی اور سلووینیا کے ممالک سے مہاجرین کو اسمگل کیا۔

انسانی اسمگلنگ کرنے والے اس گروہ نے مبینہ طور پر سن 2017 اپریل میں ایک سو گیارہ عراقی، شامی، بھارتی، پاکستانی اور افغان تارکین وطن کو جعلی دستاویزات استعمال کرتے ہوئے یورپ اسمگل کیا تھا۔

رومانیہ میں منظم جرائم کی تفتیش کرنے والی ڈائریکٹوریٹ کے بیان میں شبہ ظاہر کیا گیا ہے کہ ان اسمگلروں نے بارڈر پولیس کو رشوت بھی دی تاکہ ہنگری میں داخل ہوتے وقت سرحد پر اُن کی گاڑیوں کو چیک نہ کیا جائے۔

خیال رہے کہ ہنگری یورپی یونین میں شینگن ویزا فری زون میں شامل ہے تاہم رومانیہ اس سے باہر ہے۔

اُدھر اطالوی حکام کے مطابق سسلی اور تنزانیہ کے درمیان تارکین وطن کی مبینہ اسمگلنگ میں ملوث تیرہ افراد کو گرفتار کر لیا گیا ہے۔ بتایا گیا ہے کہ اس گروپ کے ارکان انتہا پسند جہادی نظریات کی جانب جھکاؤ رکھتے ہیں۔

اطالوی پولیس نے آج بروز منگل 11 اپریل کو بتایا ہے کہ دو انسانی اسمگلروں کی فون پر گفتگو کی ایک ریکارڈنگ افشا ہوئی ہے جس میں ایک شخص دوسرے کو فرانس میں دہشت گردانہ حملہ کرنے کے لیے روانہ ہونے اور اس میں کامیابی کے لیے دعا کرنے کو کہہ رہا ہے۔

اطلاعات کے مطابق مہاجرین کو یورپ اسمگل کرنے والے یہ افراد مبینہ طور پر تنزانیہ کی نابیول بندرگاہ سے سسلی تک ربڑ کی کشتیوں اور ماہر نیوی گیٹر افراد کا استعمال کرتے تھے جبکہ اس سفر کے لیے ہر تارک وطن سے تین ہزار سے پانچ ہزار یورو تک کی رقم وصول کی جاتی تھی۔

پولیس کا کہنا ہے کہ ان مشتبہ اسمگلروں میں اٹلی، مراکش اور تنزانیہ سے تعلق رکھنے والے افراد بھی شامل ہیں۔

ص ح/ اے پی