ریل کی پٹری، ٹرین کی رفتار، فلرٹ اور محبّت

لیکن کیا آپ کبھی ایسی ٹرین میں بیٹھے ہیں جس میں سفر کرنے کا مقصد محبّت میں گرفتار ہونا ہو۔ یعنی ریل کی پٹری پر فلرٹ اور وہ بھی ٹرین کی رفتار سے!

ہر سال چودہ فروری کو محبّت کرنے والوں کا دن منایا جاتا ہے۔ یہ دن اُن سب کا ہے، جن کے دل دھڑکتے ہیں، اپنے محبوب کے لئے، یہ دن ہے محبّت کا، محبّت کرنے والوں کا اور محبّت پر یقین رکھنے والوں کا۔ یہاں جرمنی میں ویلینٹائنز ڈے کو بڑی دھوم دھام سے منایا گیا۔ اس موقع پر جرمن قومی ریلوے کمپنی ڈوئچے بان نے تو کمال ہی کردیا۔

ویلینٹائنز ڈے سے ایک روز پہلے ہی جرمن دارالحکومت برلن میں ساٹھ سنگلز پوسٹ ڈامر پلاٹز سٹیشن پر ایک سپیشل ٹرین میں بیٹھنے کے لئے بے صبری سے انتظار کررہے تھے۔ یہ ٹرین تھی ’’فلرٹ ایکسپریس‘‘۔ ڈوئچے بان کی اس خصوصی ٹرین کو رنگ برنگے دل کی شکل والے غباروں سے سجایا گیا تھا۔ دلہن کی طرح سجایا گیا تھا اس ٹرین کو۔ برلن کی مشہور ’’پینیروما ایکسپریس،، ایک رات کے لئے اب ’’فلرٹ ایکسپریس‘‘ میں تبدیل ہوچکی تھی۔ اس ٹرین میں سوار ہونے والی خواتین کا استقبال سُرخ رنگ کے گلابوں سے کیا گیا۔ ریڈ روز یعنی محبّت کی علامت اور پیار کی نشانی۔

ڈوئچے بان نے گُذشتہ سال فلرٹ ایکسپریس ٹرین کو متعارف کرایا تھا۔ پچھلے سال اس ایوینٹ کی کامیابی کے لئے زبردست رعایت دی گئی تھی اور شاید اسی لئے ٹرین میں محض آٹھ سو سیٹوں کے لئے پانچ ہزار سنگلز نے رجسٹریشن کرائی تھی۔

اور اس سال اس تجربے کو دہرایا گیا۔ اس سروس کا صرف برلن میں آباد لڑکے لڑکیوں نے ہی فائدہ نہیں اُٹھایا بلکہ یہ فلرٹ تو جرمنی کے دس شہروں میں ہوا۔ فلرٹ ایکسپریس جہاں، محبّت وہاں! اب سوال یہ ہےکہ محبّت کیسے ہوگئی۔ ٹرین میں میوزک، ڈرنکس، پارٹی اور خوبصورت لڑکیاں بھی۔ یعنی پیار تو ہونا ہی تھا! سب بیٹھے ہیں اور ڈوئچے بان کا ماڈریٹر محبّت کے مسافروں کو فلرٹ کے قوائد و ضوابط سمجھا رہا ہے۔ اور نوجوان لڑکے لڑکیاں غور سے رولز سن رہے ہیں۔ پوری ٹرپ کے دوران لڑکیاں اپنی جگہ تبدیل نہیں کرتی ہیں لیکن لڑکوں کو اپنی جگہ تبدیل کرنا پڑتی ہے۔ یہاں بھی ظلم! تین منٹ تک لڑکا لڑکی ایک دوسرے کے ساتھ بات چیت کرتے ہیں۔ ٹائم اپ اور اگر تب تک بات نہیں بنی، نیا امیدوار حاضر خدمت! اور اگر بات سے بات بنی، لڑکے کو لڑکی اور لڑکی کو لڑکا پسند آگیا تو موبائل نمبروں کا تبادلہ، ای میل ایکسچینج، اور اگلے ڈیٹ کی ڈیٹ فکس۔ ینعی لَو ایٹ فرسٹ سائٹ۔