سری لنکن ٹیم پر حملہ کرنے والوں کی شناخت ہوگئی ہے، پاکستانی حکّام

پاکستان کے صوبہِ پنجاب کے گورنرسلمان تاثیر نے ایک پریس کانفرنس سے خطاب کرتے ہوئے کہا ہے کہ سری لنکن کرکٹ ٹیم پرحملہ کرنے والوں کی شناخت کرلی گئی ہے۔ ان کے مطابق اس ضمن میں متعدد گرفتاریاں کی گئی ہیں اوربعض حملہ آوروں کا تعاقب کیا جا رہا ہے۔ سلمان تاثیر نے اس حوالے سے کسی تنظیم یا گروہ کا نام لینے سے اجتناب کیا ہے اور کہا ہے کہ مزید تفصیلات وہ چند رور میں پیش کریں گے۔

واضح رہے کہ لاہور میں سری لنکن کرکٹ ٹیم پرمسلّح حملے کے نتیجے میں ٹیم کی حفاظت پرمعمور چھ پولیس اہلکاراور سری لنکن ٹیم کا بس ڈرائورہلاک ہوگئے تھے اوراس واقعے میں چھ کھلاڑی زخمی بھی ہوئے تھے۔ واقعے کے بعد سری لنکا اور پاکستان کے درمیان دوسرال ٹیسٹ میچ منسوخ کردیا گیا تھا اورسری لنکن ٹیم واپس اپنے وطن روانہ ہو گئی تھی۔

مذکورہ حملے کے الزام میں القاعدہ اورطالبان سمیت متعدد نام لیے جا رہے ہیں۔ بعض پاکستانی حکّام نے اس حوالے سے غیرملکی عناصر پر بھی الزام عائد کیا ہے۔

قبل ازیں لاہور کے پولیس انسپیکٹر آصف رشید نے چار مسلّح حملہ آوروں کے فرضی خاکے بھی پیش کیے جو پچیس سے تیس برس کی عمروں کے درمیان دکھائی دیتے ہیں۔

یہ پہلا موقع ہے کہ پاکستانی حکّام نے باقاعدہ طورایک پریس کانفرنس میں اس بات کا اعلان کیا ہے کہ حملہ آوروں کی شناخت ہوگئی ہے۔ تاہم مزید تفصیلات سامنے آنے کے بعد ہی طے کیا جا سکے گا کہ پاکستانی حکّام سری لنکن ٹیم پرحملے کا حتمی الزام کس پرعائد کرتے ہیں۔