سعودی عرب سمیت مشرق وسطیٰ میں ’مشترکہ منڈی کا قیام ممکن‘

تل ابیب سے پیر گیارہ جولائی کو موصولہ رپورٹوں کے مطابق اسرائیلی وزیر خزانہ ایوگڈور لیبرمین کا کہنا ہے کہ اسی ہفتے بدھ کے روز جب امریکی صدر جو بائیڈن پہلے اسرائیل اور پھر جمعے کے روز سعودی عرب پہنچیں گے، تو اس دورے کے نتیجے میں خطے میں اہم سیاسی پیش رفت دیکھنے میں آئے گی۔

لیبرمین نے امید ظاہر کی کہ صدر بائیڈن کے اس دورے کے بعد مشرق وسطیٰ میں ایک ایسی علاقائی مشترکہ منڈی کے قیام کی کوششوں میں بھی واضح پیش رفت ہو گی، جس میں سعودی عرب بھی شامل ہو گا۔

اسرائیل سے سعودی عرب براہ راست پروازیں کب تک؟

واشنگٹن میں وائٹ ہاؤس کے مطابق جو بائیڈن کے اس دورے کے مقاصد میں 'علاقائی بنیادوں پر اقتصادی اور سکیورٹی تعاون میں اضافہ‘ بھی شامل ہے۔

'یہی بڑا چیلنج ہے‘

اسرائیل میں ایک جریدے کی طرف سے اہتمام کردہ اقتصادی کانفرنس کے موقع پر اسرائیلی وزیر خزانہ لیبرمین سے پیر کے روز جب یہ پوچھا گیا کہ وہ امریکی صدر بائیڈن کے مشرق وسطیٰ کے آئندہ دورے سے کیا توقعات وابستہ کیے ہوئے ہیں، تو لیبرمین نے کہا، ''مشرق وسطیٰ میں ایک نئی مشترکہ منڈی کا قیام۔ یہی ایک بڑا چیلنج ہے۔‘‘

مشرق وسطیٰ کے لیے ایک ’نیٹو‘ قیام کے مرحلے میں؟

لیبرمین نے اپنے جواب میں کہا، ''ایسی کسی پیش رفت سے یہاں (خطے کے) حالات اور حقائق، سکیورٹی اور اقتصادیات دونوں شعبوں میں، قطعی طور پر بدل جائیں گے۔ اس لیے مجھے امید ہے کہ صدر بائیڈن کے اس دورے کے دوران زیادہ زور مشرق وسطیٰ میں ایک نئی مشترکہ منڈی کے قیام پر دیا جائے گا۔‘‘

پورے مشرق وسطیٰ کو جوڑنے والی ہائی وے اور ریل رابطے

ایوگڈور لیبرمین نے مزید کہا کہ ان کے ذہن میں اس پورے خطے سے متعلق جو تصور پایا جاتا ہے، اس میں یہ بھی شامل ہے کہ اس پورے خطے میں ایک 'ٹرانس مڈل ایسٹ ہائی وے‘ بھی ہونا چاہیے اور ایک ایسا ریلوے نیٹ ورک بھی، جو مختلف پارٹنر ممالک کو آپس میں جوڑ سکے۔

بھارت، اسرائیل، امریکہ اور امارات پر مشتمل نئے گروپ ’آئی ٹو یو ٹو‘ کا قیام

اسرائیل نے امریکا کی طرف سے شروع کردہ سفارتی کوششوں کے نیتجے میں اور ریاض میں سعودی قیادت کی خاموش رضا مندی کے ساتھ 2020ء میں  چار عرب ریاستوں کے ساتھ باقاعدہ تعلقات قائم کر لیے تھے۔ خود سعودی عرب نے تاہم ابھی تک اسرائیل کے ریاستی وجود کو باقاعدہ طور پر تسلیم نہیں کیا، جس کی وجہ فلسطینیوں کے لیے ان کی ایک علیحدہ ریاست کے قیام سے متعلق قرارداد پر تاحال عمل درآمد نہ ہونا ہے۔

بائیڈن کا اسرائیل سے براہ راست سعوی عرب تک کا سفر

اسی دوران اسرائیل میں آج اسی اقتصادی کانفرنس کے موقع پر اپنے ایک علیحدہ تبصرے میں اسرائیل کے قومی سلامتی کے مشیر ایال ہولاتا نے بھی کہا کہ امریکی صدر جو بائیڈن کے خطے کے اس دورے کے دائرہ کار میں ''یہ بات یقینی طور پر ممکن ہے کہ خطے میں ہماری منڈیوں میں ممکنہ توسیع کے بارے میں بات چیت کی جائے۔‘‘

فٹ بال ورلڈ کپ، اسرائیلی شہریوں کو قطر آنے کی خصوصی اجازت

ایال ہولاتا نے کہا، ''یہ بات محض کوئی اتفاق نہیں کہ صدر بائیڈن بدھ کے روز یہاں آئیں گے اور پھر جمعے کے روز یہاں سے ہی براہ راست فلائٹ کے ذریعے سعودی عرب جائیں گے۔‘‘

قومی سلامتی کے اسرائیلی مشیر نے مزید کہا، ''ایسے معاملات پر مرحلہ وار اور بڑی احتیاط سے توجہ دینے کی اہلیت ہی وہ سیڑھی ہے، جس کے ذریعے بڑی تبدیلیاں لائی جا سکتی ہیں۔‘‘

م م / ع ا (روئٹرز، اے پی)