’شام کے تمام اضلاع میں ہنگامی صورتحال پیدا ہو چکی ہے‘

شورش زدہ ملک شامل میں اب جنگی حالات تو قدرے بہتر ہیں لیکن وہاں کے عوام کا حال ہر گزرتے دن کے ساتھ مزید خراب ہوتا جا رہا ہے۔ اقوام متحدہ نے کہا کہ بارہ سال قبل خانہ جنگی کے آغاز کے بعد پہلی مرتبہ تمام انتظامی اضلاع میں انسانی ہنگامی صورتحال پیدا ہو چکی ہے۔ جاری ہونے والے ایک بیان کے مطابق 22 ملین باشندوں میں سے نصف سے زیادہ کو خوراک کے عدم تحفظ کا خطرہ لاحق ہے۔

عرب اسد کو گلے لگا رہے ہیں، کیا اس سے عام شامیوں کو مدد ملے گی؟

انسانی حقوق کی جرمن تنظیم 'ڈیاکونی ڈیزاسٹر ریلیف‘ نے ایک بیان جاری کرتے ہوئے کہا ہے کہ ایسے افراد کی تعداد میں اضافہ ہو رہا ہے، جن کے پاس بمشکل ایک دن کا کھانا ہوتا ہے اور انہیں یہ علم نہیں ہوتا کہ آئندہ کل انہیں کھانا نصیب ہو گا یا نہیں؟ 

 اسی لیے اس تنظیم کی طرف سے بین الاقوامی برادری سے کافی مالی وسائل فراہم کرنے کا مطالبہ کیا گیا ہے۔ دوسری جانب اقوام متحدہ کے ورلڈ فوڈ پروگرام (ڈبلیو ایف پی) نے کہا ہے کہ وہ شام میں 5.5 ملین میں سے تقریباً 2.5 ملین لوگوں کی امداد پہلے ہی کم کر رہا ہے کیونکہ اس کے پاس کافی رقم دستیاب نہیں ہے۔ ڈبلیو ایف پی کو اس بات پر تشویش ہے کہ ملک میں بڑھتی ہوئی ضروریات کو پورا کرنے کے لیے مزید فنڈنگ نہیں ہو سکتی۔

خانہ جنگی کے شکار ملک شام کے لیے ایسی پہلی ڈونر کانفرنس کا انعقاد سن دو ہزار سترہ میں کیا گیا تھا۔ آج برسلز میں ہونے والی امدادی کانفرنس میں شریک ریاستوں اور تنظیموں کے نمائندے شام کی صورت حال پر تبادلہ خیال کرنے کے ساتھ ساتھ مالی وعدوں کی توثیق اور امداد کو متحرک بنانے کا طریقہ کار طے کریں گے۔

گزشتہ سال شامی کانفرنس میں کل 6.4 بلین یورو امداد کے وعدے کیے گئے تھے لیکن اس ملک کو اپنے پاؤں پر کھڑا ہونے کے لیے ابھی کئی برس لگ سکتے ہیں۔ بارہ سال کی خانہ جنگی کے بعد شام ٹکڑے ٹکڑے اور بڑی حد تک تباہ ہو چکا ہے۔

دوسری جانب اس سال فروری میں آنے والے زلزلے کی تباہ کاریوں نے صورتحال کو مزید گھمبیر بنا دیا ہے۔ اس تباہ کن زلزلے کے بعد ترکی میں تو واضح طور پر امداد پہنچی تھی لیکن بین الاقوامی پابندیوں کے باعث شام کے عوام تک بہت کم امداد پہنچ پائی تھی۔

ا ا / ع ت (ڈی پی اے، روئٹرز)