صدارتی الیکشن میں ایردوآن کامیاب، ترک انتخابی بورڈ کا اعلان

تقریباﹰ 85 ملین کی آبادی والے ملک ترکی میں اتوار کے روز ہونے والی رائے دہی میں قریب 64 ملین رائے دہندگان کو اس لیے صرف دو ہفتے بعد ہی ایک بار پھر ووٹنگ کے لیے کہا گیا تھا کہ 14 مئی کے دن انہی انتخابات کے پہلے مرحلے میں کوئی بھی امیدوار قطعی اکثریت حاصل نہیں کر سکا تھا۔

ترکی میں صدارتی انتخابات کے دوسرے مرحلے میں ووٹنگ مکمل

تب موجودہ صدر ایردوآن بہت معمولی فرق سے قطعی اکثریت یعنی 50 فیصد سے زائد ووٹ حاصل کرنے میں ناکام رہے تھے اور ان کے قریب ترین حریف ریپبلکن پیپلز پارٹی (سی ایچ پی) کے سیکولر رہنما کمال کلیچدار اولو رہے تھے، جو آج اتوار کی رائے دہی میں ان کے واحد حریف بھی تھے۔

دوسرے مرحلے میں رائے دہی صبح آٹھ بجے شروع ہو کر شام پانچ بجے تک جاری رہی، جس کے بعد ووٹوں کی گنتی کا عمل شروع ہو گیا۔

ترک حکومت اور اپوزیشن کے حامی دونوں طرح کے ملکی ذرائع ابلاغ کے مطابق اتوار کی شام تک، جب کُل ڈالے گئے ووٹوں میں سے 97 فیصد کی گنتی مکمل ہو چکی تھی اور اس کے غیر حتمی نتائج سامنے آ چکے تھے، صدر ایردوآن 52 فیصد سے زائد عوامی تائید حاصل کر چکے تھے۔ ان کے برعکس تب تک اپوزیشن امیدوار کلیچدار اولو کو تقریباﹰ 48 فیصد تائید حاصل ہوئی تھی۔

ترک انتخابات: تیسری پوزیشن والے امیدوار کا ایردوآن کی حمایت کا فیصلہ

دوسری طرف سرکاری نیوز ایجنسی انادولو نے بھی لکھا کہ 90 فیصد سے زائد ووٹوں کی گنتی مکمل ہو جانے کے بعد تک ایردوآن کو ملنے والے ووٹ 53 فیصد اور کلیچدار اولو کو ملنے والے ووٹ تقریباﹰ 47 فیصد بنتے تھے۔

یہ عبوری انتخابی نتائج ظاہر کرتے ہیں کہ صدر ایردوآن کو ترک عوام نے اکثریتی رائے سے دوبارہ سربراہ مملکت منتخب تو کر لیا ہے تاہم انہیں اور ان کے حریف امیدوار کو ملنے والی تائید میں حتمی فرق شاید چار سے چھ فیصد تک ہی رہے گا۔

ایردوآن کا اپنی کامیابی کا اعلان

اتوار کی رات جب ووٹوں کی گنتی شروع ہوئے کئی گھنٹے ہو چکے تھے اور یہ عمل تقریباﹰ مکمل بھی ہو چکا تھا، صدر ایردوآن نے استنبول میں اپنے حامیوں سے خطاب کرتے ہوئے یہ اعلان بھی کر دیا کہ ترک عوام نے ان کے حق میں رائے دی ہے اور انہیں یہ فرض سونپا ہے کہ وہ اگلے پانچ سال تک اقتدار میں رہیں۔

ترک صدر رجب طیب ایردوآن کی سیاسی زندگی پر ایک نظر

ایک بس کی چھت پر سوار رجب طیب ایردوآن نے اپنے حامیوں سے خطاب کرتے ہوئے کہا کہ اس صدارتی الیکشن کا واحد فاتح ترکی ہو گا۔ ایردوآن ترکی میں اپنے اقتدار کی دو دہائیاں مکمل کر چکے ہیں۔ اس دوران وہ وزیر اعظم بھی رہے اور ملک میں صدارتی پارلیمانی نظام متعارف کرائے جانے کے بعد سربراہ مملکت بھی۔ ان کی تازہ انتخابی کامیابی کے ساتھ ترکی میں ان کے اقتدار کا تیسرا عشرہ شروع ہو جائے گا۔

ترکی میں جمہوریت کے اتار چڑھاؤ کے سو سال

دریں اثنا کئی غیر ملکی رہنماؤں نے صدر ایردوآن کو ان کے دوبارہ انتخاب پر مبارکباد کے پیغامات بھیجنا شروع کر دیے ہیں۔ ان میں سے جن غیر ملکی رہنماؤں نے فوری طور پر ترک صدر کو مبارک دی، ان میں روسی صدر ولادیمیر پوٹن بھی شامل تھے۔

روسی صدر پوٹن کے علاوہ پاکستانی صدر عارف علوی اور ایرانی صدر ابراہیم رئیسی نے بھی صدر ایردوآن کو ان کی انتخابی جیت پر مبارک باد کے پیغامات بھیجے ہیں۔

آخری اطلاعات کے مطابق ترکی کے اعلیٰ انتخابی بورڈ کے سربراہ نے بھی کچھ ہی دیر پہلے اعلان کر دیا ہے کہ رجب طیب ایردوآن نے صدارتی الیکشن جیت لیا ہے۔

م م / ع ا (روئٹرز، اے پی، اے ایف پی)