ايک دن ميں کورونا کے تقريباً چھ لاکھ کيسز، نيا ريکارڈ

عالمی ادارہ صحت نے ہفتے کی صبح اعلان کيا ہے کہ جمعے کو عالمی سطح پر  کورونا کے 581,679 نئے کيسز سامنے آئے۔ اس سے قبل ايک دن ميں سب سے زيادہ کيسز کا ريکارڈ اکتيس اکتوبر کو قائم ہوا تھا تاہم چھ نومبر کو سامنے آنے والے کيسز کی تعداد اس سے چوبيس ہزار زائد ہے۔

دنیا بھر میں کورونا وائرس سے متاثرہ افراد کی تعداد 49.04 ملین ہو گئی ہے۔ اس عالمی وبا کے نتیجے میں ہونے والی مصدقہ ہلاکتیں اب 1,238,751 ہو چکی ہیں۔ اس وائرس سے سب سے زیادہ متاثرہ ملک امریکا ہے جہاں اب تک 9,650,284 افراد کورونا وائرس سے متاثر ہو چکے ہیں جب کہ امریکا میں ہلاکتوں کی تعداد 235,031 ہے۔ بھارت اس فہرست میں دوسرے نمبر پر ہے جہاں مجموعی طور پر 8,411,724 افراد میں اس وائرس کی تشخیص ہو چکی ہے جب کہ یہاں ہلاکتیں 124,985 ہوئی ہیں۔

جرمنی ميں لاک ڈاؤن کی مخالفت ميں مظاہرے

جرمنی کے مختلف شہروں میں اس اختتام ہفتہ پر  کورونا وائرس لاک ڈاؤن کے خلاف بڑے مظاہرے کیے جا رہے ہیں۔ مشرقی جرمن شہر لائپزگ میں حکام نے بتایا کہ سوشل میڈیا پر پرتشدد حملوں کی کالز دی جا رہی ہیں۔ بتایا گیا ہے کہ ان مظاہروں کی کالز انتہائی دائیں اور انتہائی بائیں بازو سے تعلق رکھنے والے چند افراد اور تنظیموں کی جانب سے سامنے آ رہی ہیں۔ جرمنی میں کورونا وائرس کی دوسری لہر کے تناظر میں ایک مرتبہ پھر ملک بھر میں لاک ڈاؤن نافذ ہے، جس کے تحت لوگوں سے کہا گیا ہے کہ وہ فقط ضروری افعال کے لیے گھروں سے نکلیں۔

جرمنی ميں پچھلے چوبيس گھنٹوں کے دوران کوروناوائرس کے 23,399 نئے کيسز سامنے آئے، جس کے بعد ملک ميں متاثرين کی مجموعی تعداد 642,488 ہو گئی ہے۔ اس ملک ميں بھی يوميہ بنيادوں پر سب سے زيادہ کيسز کا يہ نيا ريکارڈ ہے۔ جرمنی ميں اب تک کووڈ انيس کے۔ باعث ہلاک ہونے والوں کی تعداد 11,226 ہے۔

وائٹ ہاؤس کے چيف آف اسٹاف مارک ميڈوز بھی کورونا وائرس ميں مبتلا

ادھر امريکی صدر ڈونلڈ ٹرمپ کے قريبی ساتھی اور وائٹ ہاؤس کے چيف آف اسٹاف مارک ميڈوز بھی کورونا وائرس ميں مبتلا ہو گئے ہيں۔ امريکی نشرياتی اداروں نے اس بارے ميں اطلاع آج بروز ہفتہ دی۔ يہ بھی بتايا گيا ہے کہ صدارتی دفتر کے دو اور اہلکاروں ميں بھی کورونا وائرس کی تشخيص ہوئی ہے۔

ع س / ع ت (روئٹرز)