عرب دنیا میں جوڑ توڑ کرنے والی جاسوسہ پر فلم :ملکہٴ صحرا‘

آکسفورڈ یونیورسٹی سے گریجویشن کرنے والی خاتون جاسوسہ کا پورا نام گرٹرُوڈ مارگریٹ بیل تھا لیکن وہ صرف دو ناموں سے پکاری گئی اور وہ ہیں گرٹرُوڈ بیل۔ وہ چودہ جولائی سن 1868 میں پیدا ہوئی اور سن 1926 میں زیادہ خواب آور گولیاں کھانے سے فوت ہوئی۔ وہ ابتدا میں پولیس کے محکمے سے وابستہ رہی اور بعد میں وہ اُسے پہلی مرتبہ غیر ملک میں تعیناتی حاصل ہوئی۔ سن 1892 میں وہ پہلی مرتبہ ایرانی دارالحکومت تہران کے برطانوی سفارت خانے میں تعینات کی گئی۔ اِس تعیناتی کے بعد وہ جوڑ توڑ اور ساز باز کے ایسے سفر پر چل پڑی کہ اُس دور کی لندن حکومت اور شاہی اشرفیہ میں بیل کا اثر و رسوخ تسلیم کیا جاتا تھا۔ کہا جاتا ہے کہ موجودہ اُردن اور عراق کی بطور جغرافیائی شناخت اور ملک کے قیام میں وہ پیش پیش تھی۔ اِس کے علاوہ عرب دنیا کے نقشے پر ابھرنے والے چند اور ممالک بھی اُس کی کوششوں کا نتیجہ سمجھے جاتے ہیں۔

جرمن ہدایت کار ویرنر ہرزوگ نے گرٹرُوڈ بیل کے کردار کو ڈھونڈ کر ایک فلم ’کوئین آف دی ڈیزرٹ‘ کے ٹائٹل سے بنائی ہے۔ یہ امر اہم ہے کہ جدید جرمن سینما میں ویرمن ہرزوگ ایک انتہائی معتبر نام ہے۔ ’کوئین آف دی ڈیزرٹ‘ رواں برس جرمن دارالحکومت برلن میں منعقد ہونے والے سالانہ بین الاقوامی فلمی میلے کی ایک اہم فلم خیال کی گئی ہے۔ فیسٹول میں کُل انیس فلمیں مرکزی مقابلے میں شامل ہیں۔ ناقدین کے مطابق برلینالے فلم فیسٹول میں فلم ’کوئین آف دی ڈیزرٹ‘ کو سب سے بڑا انعام گولڈن بیئر دیا جا سکتا ہے۔ اِس فلم کا مرکزی کردار آسکر ایوارڈ یافتہ آسٹریلین اداکارہ نکول کِڈ مین نے ادا کیا ہے۔

نکول کِڈ مین نے بھی ہرزوگ کی فلم کے حوالےسے اعتراف کیا تھا کہ اِس فلم میں کام کرنے سے قبل وہ گرٹرُوڈ بیل نامی تاریخی خاتون کے بارے میں کوئی معلومات نہیں رکھتی تھیں، جس نے سلطنت عثمانیہ کے زوال میں عرب بدُو قبائل میں گہرے تعلقات قائم کر کے مشرقِ وسطیٰ کے جغرافیے کو تبدیل کر دیا تھا۔ کِڈمین نے برلینالے کے دوران رپورٹرز سے گفتگو کرتے ہوئے گرٹرُوڈ بیل کو شاندار الفاظ میں خراجِ تحسین بھی پیش کیا۔ کِڈ مین کا کہنا تھا کہ سب لوگ لارنس آف عریبیہ کے بارے میں بات کرتے ہیں لیکن کوئی گرٹرُوڈ بیل جیسی اہم تاریخی شخصیت کے بارے میں نہیں جانتا۔

جرمن ہدایت کار ویرنر ہرزوگ کی شہرت دستاویزی فلموں کے حوالے سے ہے۔ اُن کے نام پر گریزلی مین اور گُم شدہ خوابوں کی غار (Cave of Forgotten Dreams) جیسی معروف دستاویزی فلمیں ہیں۔ ہرزوگ نے فلم ’کوئین آف دی ڈیزرٹ‘ کی تخلیق پر مسرت کا اظہار کرتے ہوئے کہا کہ گرٹرُوڈ بیل کی دریافت کا سہرا انہیں حاصل ہوا ہے اور وہ مستقبل میں بھی ایسے گم شدہ تاریخی کرداروں کا کھوج لگاتے رہیں گے۔ ہدایتکار ہرزوگ نے خاص طور پر صحرا میں جا کر اس فلم کی عکاسی کی اور اِّس دوران حقیقی صحرائی طوفان کا سامنا کرتے ہوئے اُس کی بھی عکس بندی کا انہیں موقع ملا۔ یہ صحرائی طوفان فلم میں بھی شامل ہے۔ نکول کڈمین نے خاص طور پر اونٹ پر سواری کی تربیت بھی حاصل کی۔