علاقائی جنگ سے بچاؤ: امریکہ اسرائیل کو ’کنٹرول‘ کرے، ایران

ایرانی وزیر خارجہ کی طرف سے یہ بیان ایک ایسے موقع پر سامنے آیا ہے جب فلسطینی عسکریت پسند تنظیم حماس کی طرف سے اسرائیل کے اندر حملوں کے بعد سے فریقین کے درمیان ساتویں روز بھی شیلنگ کا تبادلہ جاری ہے۔ حماس کے ان حملوں میں اسرائیلی فوج اور عام شہریوں کی ہلاکتوں کی تعداد 1300 سے تجاوز کر چکی ہے۔

اسرائیل نے جوابی کارروائی کرتے ہوئے غزہ پٹی میں حماس کے ٹھکانوں پر فضائی اور توپ خانے کے حملے کیے ہیں، جن کے نتیجے میں ہلاکتوں کی تعداد 1530 سے تجاوز کر چکی ہے۔

شمالی غزہ پٹی سے انخلا، اسرائیل نے چوبیس گھنٹے کی مہلت دے دی

غزہ کے باشندے اپنی سرزمین پر ہی رہیں، مصری صدر السیسی

لبنان کے دارالحکومت بیروت میں ایرانی وزیر خارجہ کا کہنا تھا، ''امریکہ اسرائیل کو غزہ کو تباہ کرنے کا موقع دینا چاہتا ہے اور یہ... ایک خطرناک غلطی ہے۔‘‘ امیر عبداللھیان نے مزید کہا، ''اگر امریکی قیادت خطے میں جنگ کو بڑھنے سے روکنا چاہتی ہے تو اسے اسرائیل کو کنٹرول کرنا ہوگا۔‘‘

اگرچہ تہران فلسطینی عسکریت پسند گروپ حماس کا طویل عرصے سے حمایتی رہا ہے تاہم ایرانی حکام اس بات پر بضد ہیں کہ اس گروپ کی طرف سے ہفتہ سات اکتوبر  کو اسرائیل پر کیے گئے حملے میں اسلامی جمہوریہ ایران کا کوئی کردار نہیں تھا۔

حالیہ دنوں میں لبنان اور اسرائیل کے درمیان لڑائی اور سرحدی کشیدگی کے تناظر میں امیر عبداللھیان جمعرات کی شب بغداد سے واپسی پر بیروت پہنچے۔ انہوں نے لبنان کے وزیر اعظم نجیب میکاتی سے ملاقات کے بعد کہا کہ لبنان کی سلامتی اور امن ایران کے لیے اہم ہیں۔ ان کا مزید کہنا تھا کہ ان کے دورے کا ایک مقصد لبنان کی سلامتی پر زور دینا ہے۔

تاہم ایرانی وزیر خارجہ نے اسرائیل اور لبنان کے درمیان کشیدگی میں اضافے کے امکان کو مکمل طور پر مسترد نہیں کیا۔

آج جمعہ 13 اکتوبر کو اپنے لبنانی ہم منصب کے ساتھ ایک نیوز کانفرنس کے دوران انہوں نے کہا، ''اگر صیہونی حکومت کے منظم جنگی جرائم فوری طور پر بند نہ ہوئے تو کوئی بھی صورتحال پیدا ہو سکتی ہے۔‘‘

ایرانی وزیر خارجہ کے مطابق تہران اسلامی تعاون کی تنظیم کے ہنگامی اجلاس کی میزبانی کے لیے کام کر رہا ہے، جس میں 57 ممالک شامل ہیں۔

انہوں نے صحافیوں کو بتایا کہ اس سلسلے میں او آئی سی کے سیکرٹری جنرل کے ساتھ ابتدائی رابطے کیے جا چکے ہیں۔

دوسری طرف ایران نواز لبنانی تنظیم حزب اللہ کے ایک بیان کے مطابق، ''جمعے کے روز امیر عبداللھیان نے حزب اللہ کے سربراہ حسن نصراللہ سے بھی ملاقات کی اور تازہ ترین پیش رفت کی روشنی میں ممکنہ نتائج اور موقف اختیار کرنے کے حوالے سے تبادلہ خیال کیا۔‘‘

حماس کے حملوں کے بعد اسرائیل کا حالیہ دنوں میں لبنان میں حزب اللہ اور اس کے اتحادی فلسطینی دھڑوں کے ساتھ فائرنگ کا تبادلہ ہوا ہے، تاہم اس کا دائرہ محدود ہی رہا ہے۔

ا ب ا/ش ر، م م (اے ایف پی)