عمران خان کل جماعتی کانفرنس میں شرکت نہیں کریں گے، اسد عمر

پاکستان تحریک انصاف کے رہنماؤں نے وزیر اعظم شہباز شریف  کی طرف سے دہشت گردی کے معاملے سے نمٹنے کے لیے بلائی گئی کل جماعتی کانفرنس (اے پی سی) میں شرکت کے حوالے سے ملے جلے رد عمل کا اظہار کیا ہے۔ پی ٹی کے نائب چئیرمین شاہ محمود قریشی کا کہنا ہے کہ ان کی جماعت آل پارٹیز کانفرنس میں شرکت کا فیصلہ مشاورت کے بعد کرے گی۔ تاہم  تحریک انصاف کے ایک اور مرکزی رہنما اسد عمر کا کہنا ہے کہ عمران خان وزیر اعظم کی طرف سے بلائی جانے والی اس کانفرنس میں شریک نہیں ہوں گے۔

وزیر اعظم شہباز شریف نے جمعے کے روز اعلٰی ترین حکومتی فورم ایپکس کمیٹی کے اجلاس سے خطاب کرتے ہوئے کہا کہ یہ وقت کی ایک اہم ضرورت ہے کہ وفاقی اور صوبائی حکومتیں مل کر اور تمام جماعتیں اپنے سیاسی علاقائی اور مزہبی اختلافات کو بالائے طاق رکھ کر دہشت گردی کے معاملے سے نمٹیں۔

شہباز شریف کا کہنا تھا کہ پیر کے روز پشاور میں خود کش حملے  کے دوران ایک سو سے زائد افراد کی ہلاکت کے واقعے کی تحقیقات ہوں گی۔ تاہم انہوں نے اس طرح کے بیانات کو سختی سے مسترد کیا کہ زیادہ ہلاکتیں ڈرون حملے کے نتیجے میں ہوئی تھیں۔ ان کا کہناتھا کہ ایسے بے جا الزامات اور تنقید کے لیے یہ موقع مناسب نہیں تھا۔

تاہم نجی نیوز چینل جیو کے مطابق پاکستان تحریک انصاف نے وزیراعظم شہباز شریف کی زیر صدارت ہونے والے اپیکس کمیٹی کے اجلاس میں بھی شرکت کرنے سے انکار کر دیا۔ اس بارے میں جیو سے گفتگو کرتے ہوئے پی ٹی آئی کے سابق صوبائی وزیر شوکت یوسفزئی کا کہنا تھا، ''اپیکس کمیٹی کے اجلاس میں شرکت کی دعوت ملی لیکن انتقامی کاروائیاں کرنے والوں کے ساتھ کیسے بیٹھیں، ایک جانب لاشیں پڑی تھیں اور دوسری جانب یہ 417 ارب روپےکا حساب مانگ رہے تھے، اپیکس کمیٹی کے اجلاس میں نہیں جائیں گے۔‘‘

وزیر اعظم شہباز شریف کا کہنا تھا کہ وہ تمام جماعتوں سے اپیل کرتے ہیں کہ منگل کو دہشت گردی کے خلاف ہونے والیآل پارٹیز کانفرنس  میں بھر پور شرکت کریں۔ اس موقع ہر تحریک انصاف کے سر براہ کا نام لیے بغیر ان پر تنقید کرتے ہوئے شہباز شریف کا کہنا تھا کہ ایک طرف دہشت گردوں کو یہاں بسانے کے لیے لایا گیا مگر دوسری جانب آپ ملک کی تقدیر سنوارنے کے لیے اپنوں سے ہاتھ ملانے کے لیے بھی تیار نہیں۔ انہوں نے کہا، ''میں نے ایک پارٹی کے لیڈر کو بھی مدعو کیا ہے جو میرے ساتھ ہاتھ ملانا بھی پسند نہیں کرتے۔ مجھے امید ہے آگے سے نفی میں جواب نہیں آئے گا۔ قوم کے وسیع تر مقصد کے لیے ہم اکٹھے ہوں گے۔‘‘

’اے پی سی چھوڑو، الیکشن کرواؤ‘

تحریک انصاف کے رہنما شاہ محمود قریشی نے مقامی ذرائع ابلاغ سے بات کرتے ہوئے کہا کہ حکومت ایک طرف مذاکرات کی دعوت دے رہی ہے اور دوسری جانب انتقامی کارروائیاں کر رہی ہے۔ انہوں نے کہا کہ حکومتی رویہ ظاہر کر رہا ہے کہ دہشت گردے جیسے سنگین مسئلے سے نمٹنا اس کے بس میں نہیں رہا۔

اس سے قبل اسد عمر نے لاہور ہائی کورٹ کے باہر میڈیا سے گفتگو کرتے ہوئے دو ٹوک انداز میں کہا کہ عمران خان شہباز شریف کی طرف سے بلائی گئی کل جماعتی کانفرنس میں شرکت نہیں کریں گے۔ اسد عمر کا کہنا تھا کہ ایک ایسے وقت میں جب تحریک انصاف کے رہنماؤں کو انتقامی کارروائیوں کا نشانہ بنایا جارہا ہے ایسے میں حکومت کے ساتھ کس طرح بیٹھا جا سکتا ہے۔

اسی دوران پی ٹی آئی سندھ کے صدر علی زیدی نے کہا کہ  تمام جماعتیں قومی اسمبلی کا حصہ ہیں تو ایسے میں آل پارٹیز کانفرنس کی کیا ضرورت ہے۔ اپنی ایک ٹویٹ میں زید ی نے لکھا، ٫٫اے پی سی بلانا اس بات کا کھلا اعتراف ہے کہ آج پاکستان میں عمران خان کے بغیر کوئی بھی سیاسی فیصلہ کرنا ناممکن ہے۔ اے پی سی چھوڑو، الیکشن کرواؤ!‘

دوسری جانب حکمران جماعت مسلم لیگ ن نے اسلام آباد میں منعقد کی جانے والی اسی کل جماعتی کانفرنس میں سیاسی جماعتوں کے رہنماؤں کی شرکت یقینی بنانے کے لیے رابطے جاری رکھے ہوئے ہے۔ مقامی ذرائع ابلاغ کے مطابق  وفاقی وزیر سردار ایاز صادق نے  پی ٹی آئی رہنما اسد قیصر اور  پرویز خٹک سے رابطے کیے ہیں۔

ش ر⁄ ش ح (اے پی)