فریکنگ: زیر زمین آبی ذخائر کے لیے خطرہ

خبر رساں ادارے اے ایف پی نے واشنگٹن سے اپنی رپورٹ میں لکھا ہے کہ اس جائزے کے لیے امریکا کی ڈیوک یونیورسٹی کے محققین نے پینے کے لیے استعمال ہونے والے پانی کے 141 نمونوں کا تجزیہ کیا۔ یہ نمونے شمال مشرقی پنسلوانیا کے قدرتی گیس سے مالا مال خطّے کے پرائیویٹ آبی کنووں سے لیے گئے تھے۔

ان محققین کو پتہ چلا کہ اس خطّے میں گیس کے کنووں کے ایک کلومیٹر کے دائرے کے اندر اندر واقع گھروں کے پانی میں میتھین کی مقدار چھ گنا اور ایتھین کی 23 گنا زیادہ تھی۔ دس نمونوں میں پروپین بھی پائی گئی اور یہ وہ نمونے تھے، جو گیس کے لیے ہونے والی ڈرلنگ سے ایک کلومیٹر دور واقع گھروں سے لیے گئے تھے۔

ماحولیاتی سائنس کے پروفیسر اور اس مطالعاتی جائزے کے مصنف رابرٹ جیکسن نے بتایا: ’’میتھین، ایتھین اور پروپین کی موجودگی کے ساتھ ساتھ ہائیڈرو کاربن اور ہیلیم کے آئسوٹوپس کے بارے میں نئے شواہد اس امر کی عکاسی کرتے ہیں کہ قدرتی گیس کے لیے کی جانے والی کھدائی نے کچھ گھروں کے پانی کو متاثر کیا ہے۔‘‘

ڈیوک یونیورسٹی کے سائنسدانوں کی جانب سے ماضی میں کیے گئے دو مطالعاتی جائزوں سے براہ راست یہ بات ثابت ہو گئی تھی کہ شمال مشرقی پنسلوانیا میں گیس کے لیے کھدائی کے مقامات کے قریب واقع آبی کنووں کا پانی میتھین سے آلودہ ہے۔

تاہم آرکنساس میں امریکی جیولوجیکل سروے کی جانب سے کیے جانے والے ایک تیسرے مطالعاتی جائزے میں قدرتی گیس نکالنے کے عمل کے دوران آبی آلودگی کے کوئی شواہد نہیں ملے تھے۔

جیکسن کا کہنا ہے کہ ایتھین اور پروپین کی موجودگی سے متعلق شواہد ’نئے اور ناقابل تردید ہیں‘۔ انہوں نے بتایا کہ جن مقامات پر پانی میں ایتھین اور پروپین کی موجودگی ثابت ہوئی ہے، وہاں ان عناصر کے پہنچنے کا کوئی اور حیاتیاتی ذریعہ نہیں ہے۔

ہائیڈرالک فریکچرنگ یا فریکنگ کہلانے والے طریقہء کار کی مدد سے امریکا میں قدرتی گیس کی پیداوار میں بہت بڑے پیمانے پر اضافہ دیکھنے میں آیا ہے تاہم ماحولیاتی خدشات کی وجہ سے اس طریقے پر دیگر ممالک مثلاً فرانس میں پابندی عائد ہے۔

اس طریقے میں ہائیڈرو کاربن سے بھری گہری زیر زمین تہوں میں انتہائی زیادہ دباؤ کے ساتھ پانی، ریت اور دیگر کیمیاوی عناصر پمپ کرتے ہوئے گیس نکالی جاتی ہے۔

اس سے پہلے تک ایسے کوئی شواہد نہیں ملے تھے کہ فریکنگ میں استعمال ہونے والے مادے کنووں کے پانی کو آلودہ کرتے ہیں۔

ڈیوک یونیورسٹی میں جیو کیمسٹری اور پانی کے معیار کے پروفیسر آونر وینگوش کہتے ہیں: ’’ہمارے تجزیے بتاتے ہیں کہ گیس نکالنے کے عمل کے دوران زیر زمین پانی کی ممکنہ آلودگی کا انحصار ڈرلنگ کے مقامات سے کسی آبی ذخیرے کے فاصلے اور مقامی اور علاقائی جغرافیے میں پائے جانے والے فرق پر ہوتا ہے۔‘‘ وہ کہتے ہیں کہ کسی بھی جگہ کھدائی سے پہلے ان عوامل کو نظر میں رکھنا ضروری ہے۔ یہ مطالعاتی جائزہ ’پروسیڈنگز آف دی نیشنل اکیڈمی آف سائنسز‘ میں شائع ہوا ہے۔

(aa/mm(afp