فلپائن میں جنسی رضا مندی کے لیے کم سے کم عمر اب سولہ برس

منیلا سے پیر سات مارچ کو ملنے والی رپورٹوں کے مطابق ملکی حکومت کی طرف سے اس قانونی ترمیم پر انسانی حقوق کے علاوہ بچوں کے حقوق کے تحفظ کے لیے اور بچوں کے جنسی استحصال کے خلاف سرگرم اداروں نے اطمینان کا اظہار کیا ہے اور کہا ہے کہ اب جنوبی مشرقی ایشیا کے اس ملک میں نوجوانوں کو ریپ اور جنسی استحصال سے بچانے میں مدد ملے گی۔

جنسی رضا مندی کے لیے سب سے کم عمر والے ممالک میں سے ایک

فلپائن کیتھولک مسیحی اکثریت والا ایک ایسا ایشیائی ملک ہے، جو دنیا کی ان ریاستوں میں شمار ہوتا ہے، جہاں اب تک جنسی تعلق کے قیام کے لیے قانونی رضا مندی کے حوالے سے انتہائی کم عمر والا قانون نافذ تھا۔ اس قانون کے تحت 12 سال تک کی عمر کے مقامی لڑکوں اور لڑکیوں کو بھی یہ اجازت تھی کہ اگر وہ چاہیں تو بالغ انسانوں کے ساتھ جنسی رابطے قائم کر سکتے تھے۔

امریکی پادری، فلپائنی گاؤں، جنسی جرائم کی عشروں تک پردہ پوشی

ماہرین کے مطابق یہی قانون اس امر کی وجہ بھی تھا کہ فلپائن میں نہ صرف 12 سال سے زائد عمر کے لڑکے لڑکیاں کسی بھی بالغ انسان سے جسمانی تعلق قائم کر سکتے تھے اور اسی لیے اس ملک میں بچوں کے جنسی استحصال اور جنسی مقاصد کے لیے سیاحت کا رجحان بھی واضح تھا۔

اب زیادہ سے زیادہ سزا چالیس سال قید

منیلا حکومت نے جس قانون میں ترمیم کی ہے اور جس پر ملکی صدر روڈریگو ڈوٹیرٹے نے جمعہ چار مارچ کو دستخط بھی کر دیے تھے، اس کا اعلان آج پیر سات مارچ کو کیا گیا۔ اس ترمیم شدہ قانون کے مطابق اب 16 برس سے کم عمر کے کسی بھی لڑکے یا لڑکی کے ساتھ جنسی تعلق قائم کرنا سنگین جرم ہو گا اور اس کی زیادہ سے زیادہ سزا 40 برس تک قید ہو سکتی ہے۔

کم سن بچیوں کی برہنہ تصویریں، جاپانی ہیڈ ماسٹر کو سزائے قید

اسی قانونی ترمیم میں یہ بھی کہا گیا ہے کہ ایسے ٹین ایجر جوڑوں کو آئندہ بھی استثناء حاصل رہے گا، جن کے مابین جنسی تعلق باہمی رضا مندی سے قائم ہوا ہو اور جن کے درمیان عمر کا فرق تین سال سے زیادہ نہ ہو۔

یونیسیف کا موقف

اقوام متحدہ کے بچوں کے امدادی ادارے یونیسیف کی فلپائن شاخ کی بچوں کے تحفظ سے متعلقہ امور کی ماہر مارگریٹا آردیویلا کا کہنا ہے، ''اس ترمیم شدہ قانون کے ساتھ اب ہمارے ملک میں بچوں کا جنسی جرائم اور جنسی تشدد سے تحفظ آسان ہو جائے گا، چاہے ایسا کوئی بھی تعلق آن لائن رابطوں سے شروع ہوا ہو یا بالمشافہ ملاقات سے۔‘‘

انہوں نے کہا کہ یہ امر خوش آئند ہے کہ فلپائن میں ماضی کے مقابلے میں اب زیادہ مؤثر طور پر یہ طے کر دیا گیا ہے کہ کس نوعیت کا جنسی تعلق کن حالات میں قانوناﹰ کسی نوجوان لڑکے یا لڑکی کا ریپ تصور کیا جائے گا۔

1930ء سے نافذ چلا آ رہا قانون

منیلا حکومت نے جس ملکی قانون میں ترمیم کی ہے، وہ 1930ء سے نافذ چلا آ رہا تھا۔ بچوں کے حقوق کے تحفظ کے لیے سرگرم تنظیمیں طویل عرصے سے یہ کہتی چلی آ رہی تھیں کہ جنسی تعلق کے لیے رضا مندی کی 12 سال کی کم سے کم عمر کسی بھی طور قابل فہم یا قابل قبول نہیں تھی۔

تیرہ کم سن بچیوں کا ریپ، انڈونیشی مدرسے کے پرنسپل کو عمر قید

ماضی میں 12 سال کی عمر کی یہ حد اس لیے بھی تنقید کی زد میں تھی کہ ریپ یا جنسی استحصال کے نتیجے میں حاملہ ہو جانے والی لڑکیوں کو سماجی دباؤ کے باعث اکثر اسقاط حمل بھی نہیں کروانے دیا جاتا تھا، جس کا ایک اہم سبب ملک کی اکثریتی آبادی کے کیتھولک مسیحی عقائد بھی تھے۔

ملکی پارلیمان کے دونوں ایوانوں نے اس قانونی ترمیم کی منظوری گزشتہ سال دسمبر میں ہی دے دی تھی۔

فلپائن، آن لائن چائلڈ سیکس کا بڑا عالمی مرکز

فلپائن کے بارے میں یہ بات بھی اہم ہے کہ اس ملک کی آبادی کی اکثریت غربت کا شکار ہے اور عالمی سطح یہ ملک بچوں سے آن لائن سیکس کے بڑے مراکز میں سے ایک ہے۔ وہاں بچوں کا ریپ اور بچوں سے جنسی زیادتیوں کے واقعات بھی عام ہیں۔

بھارتی خاتون کو گینگ ریپ کے بعد دہلی کی سڑکوں پر پھرایا گیا

اس ملک میں بچوں کا جنسی استحصال اتنا زیادہ ہے کہ سرکاری اعداد و شمار بھی تصدیق کرتے ہیں کہ وہاں ہر روز 10 سے لے کر 19 برس تک کی عمر کی تقریباﹰ 500 لڑکیاں بچوں کو جنم دیتی ہیں۔

ملکی حکومت کے تعاون سے یونیسیف کی طرف سے 2015ء میں مکمل کیے گئے ایک ملک گیر مطالعے سے پتہ چلا تھا کہ فلپائن میں 13 سے لے کر 17 برس تک کی عمر کے ہر پانچویں بچے کو جنسی تشدد کا سامنا رہا تھا اور ہر 25 بچوں میں سے ایک کو بچپن ہی میں ریپ بھی کر دیا گیا تھا۔

م م / ا ا (اے پی، اے ایف پی)