لوئر دیر خودکش حملہ، ہلاکتوں کی تعداد 38 تک پہنچ گئی

ہلاک ہونے والوں میں اے این پی دیر تحصیل کے صدر سلطان زیب بھی شامل ہیں۔ دھماکے میں 80 سے زیادہ لوگ زخمی بھی ہو گئے ہیں۔ عوامی نیشنل پارٹی نے اٹھارویں ترمیم کے تحت شمال مغربی سرحدی صوبے کو خیبر پختونخو ا کانام دینے کی خوشی میں جلسہ کا انعقاد کیا تھا۔ زخمیوں کو فوری طور پر ڈسٹرکٹ ہیڈ کوارٹرز ہسپتال منتقل کیا گیا۔

ادھر عوامی نیشنل پارٹی نے اس واقعے کی مذمت کرتے ہوئے کہا ہے کہ دہشت گردوں کی ان مذموم کارروائیوں سے ان کے عزائم پست نہیں ہو ں گے اور حکومت عسکریت پسندی کے خلاف جنگ جاری رکھے گی۔

پاکستانی صدر آصف زرداری، وزیراعظم یوسف رضا گیلانی اور دوسری سیاسی جماعتوں کے قائدین نے اس واقعے کی مذمت کی ہے۔ دوسری طرف ملکی وزیرداخلہ رحمان ملک نے صوبائی پولیس کے سربراہ سے واقعے کی رپورٹ طلب کر لی ہے۔

رپورٹ : بخت زمان

ادارت : افسر اعوان