’مریم نواز ہی کا عہدہ نہیں، بہت سی خاندانی تقرریاں خطرے میں‘

پاکستان تحریک انصاف کے ایک کارکن زبیر نیازی کے طرف سے وزیر اعظم نواز شریف کی صاحبزادی مریم نواز شریف کی بطور چئیر پرسن قومی یوتھ لون سکیم تقرری کو لاہور ہائی کورٹ میں چیلنج کیا گیا ہے۔ عدالت نے مریم نواز کی تقرری پر نظرثانی کرن کے لیے حکومت کو دو روز کی مہلت دی ہے اور کہا ہے کہ اگر ایسا نہ کیا گیا تو پھر عدالت اس حوالے سے خود فیصلہ جاری کرے گی۔

عدالت میں حکومتی وکیل کا موقف تھا کہ یوتھ لون کی چیئر پرسن کا عہدہ عوامی نہیں بلکہ اعزازی ہے اور وزیر اعظم کو اس پر تقرری کا اختیار ہے۔ اس پر عدالت نے سوال اٹھایا کہ اختیار رکھنے کی وجہ سے کیا کسی ان پڑھ یا باورچی کو بھی اہم عہدے پر فائز کیا جا سکتا ہے؟

پاکستان میں نواز شریف کی حکومت کو من پسند تقرریوں کے حوالے سے شدید تنقید کا سامنا ہے۔ عمران خان کے دھرنوں اور ٹی وی کے ٹاک شوز میں بھی ایسی تقرریاں زیر بحث آتی رہتی ہیں۔ اس وقت مریم نواز شریف کے علاوہ وزیر خزانہ اسحاق ڈار، وفاقی وزیر مملکت عابد شیر علی، وزیر اعلیٰ پنجاب میاں شہباز شریف، پنجاب کے وزیر خوراک بلال یاسین اور حمزہ شہباز شریف سمیت نواز شریف کے خاندان سے تعلق رکھنے والے یا اس خاندان کے منظور نظر کئی لوگ اہم حکومتی عہدوں پر فائز ہیں۔

مریم نواز کی تقرری کو چیلنج کرنے والے زبیر نیازی کے وکیل شیراز ذکا ایڈوکیٹ نے ڈی ڈبلیو کو بتایا کہ اس سے پہلے سپریم کورٹ انیتا ایوب کیس میں تعیناتیوں کے عمل میں شفافیت پر مبنی منصفانہ طریقہ کار اختیار کرنے کو لازم قرار دے چکی ہے۔ ان کے بقول لاہور ہائی کورٹ کے اس تاریخی حکم نامے کے بعد اب اعزازی عہدوں پر بھی شفافیت کو نظرانداز کر کے من پسند افراد کی تقرریاں نہیں کی جا سکیں گی۔

ایک سوال کے جواب میں ان کا کہنا تھا کہ لاہور ہائی کورٹ کے اس حکم نامے کے بعد اب ان تمام افراد کی تقرریوں کو چیلنج کیا جا سکے گا، جنہیں سیاسی بنیادوں پر تعینات کیا گیا ہے، ’’اصولی طور پر تو جمہوریت عوام کی حکومت، عوام کے ذریعے اور عوام کے لیے ہوتی ہے لیکن ہمارے ہاں خاندان کی حکومت، خاندان کے ذریعے اور خاندان کے لیے کا چلن عام رہا ہے۔‘‘

پاکستان کے سینئر تجزیہ نگار اور روزنامہ ایکسپریس کے کالم نگار سلمان عابد نے ڈی ڈبلیو کو بتایا کہ قوموں کی ترقی اور شفافیت کے معاملے میں اہم عہدوں پر اہل افراد کی تقرریاں بہت اہمیت کی حامل ہوتی ہیں، بدقسمتی سے پاکستانی معاشرے میں حکومتوں کی طرف سے من پسند افراد کو نوازنے کی روایت عرصے سے چلی آرہی ہے۔ ان کے بقول یہ سوال پاکستانی میڈیا میں اٹھایا جاتا رہا ہے کہ اربوں روپے مالیت کی قرضہ اسکیم کی سربراہی کے حوالے سے مریم نواز کے پاس مطلوبہ تعلیم اور تجربہ کتنا ہے ؟

سلمان عابد کے بقول اگر عدالت کے حکم پر مریم نواز کواب ہٹا بھی دیا جاتا ہے تو پھر بھی حکومت کی بڑی سبکی ہو گی اور آنے والے دنوں میں سیاسی بنیادوں پر میرٹ کے بغیر تعینات ہونے والے بہت سے دیگر افراد بھی اس عدالتی حکم نامے کی زد میں آسکتے ہیں۔ اس مقدمے کی آئندہ سماعت چودہ نومبر کو ہو گی۔