ممبئی میں ایپل کے پہلے بھارتی ریٹیل اسٹور کا افتتاح

ٹیکنالوجی کی معروف امریکی کمپنی ایپل کے سی ای او ٹِم کُک نے آج منگل کے روز بھارت میں ایپل کے پہلے فزیکل ریٹیل اسٹور کا افتتاح کیا۔ یہ شو روم ممبئی کے باندرہ کرلا کمپلیکس میں واقع ایک مال میں کھولا گیا ہے، جس کے دیدار کے لیے اپیل کے ہزاروں شائقین کے ساتھ ہی ٹیکنالوجی کے مداح بھی موجود تھے۔

ایپل کے چین پر انحصار میں کمی کے لیے بھارت مددگار

بھارتی بازار میں آف لائن موجودگی کو بڑھانے اور اپنے قریبی حریف سام سینگ سے مقابلہ کرنے کے لیے ایپل کا یہ ایک بڑا قدم ہے۔

تمام سمارٹ فونز کے لیے ایک ہی چارجر، نیا یورپی قانون منظور

کک اس کے لیے بھارت کا دورہ کر رہے ہیں۔ گزشتہ روز انہوں نے شو روم کے افتتاح سے قبل اپنی ایک ٹویٹ میں کہا تھا، ''ہیلو، ممبئی! ہم اپنے صارفین کو نئے ایپل کے اسٹور میں خوش آمدید کہنے کا مزید انتظار نہیں کر سکتے۔''

تین سال بعد دنیا کا ہر چوتھا آئی فون بھارت میں بنا ہوا ہو گا

اطلاعات کے مطابق بھارت میں ایپل کا دوسرا ریٹیل اسٹور دارالحکومت دہلی میں اسی ہفتے جمعرات تک کھلنے والا ہے اور اس کے لیے بھی ٹم کک دہلی آنے والے ہیں۔ اب ممبئی اور دہلی کے لوگ یا یہاں کا سفر کرنے والے ان اسٹورز سے ایپل مصنوعات کی خریداری کا تجربہ کر سکیں گے۔

اپیل کا آئی فون چودہ بھارت میں تیار کرنے کا منصوبہ

بھارت میں ایپل کے دو ریٹیل اسٹورز کھلنے پر عوام میں کافی جوش و خروش دیکھا گیا ہے اور خاص طور پر اپیل کی مصنوعات کے صارفین میں خوشی کا ماحول ہے۔ اس شاندار افتتاح میں شرکت کے لیے لوگ گجرات جیسے دور دراز علاقوں کا سفر کر کے ممبئی پہنچے تھے۔

ٹیکنالوجی کمپنیوں پر لگام لگانے کے ضابطوں پر یورپی یونین میں معاہدہ ہو گیا

ایپل اسٹور کے افتتاح میں شرکت کے لیے تقریباً 5000 تکنیکی شائقین پہنچے، جن میں سے کچھ صبح آٹھ بجے ہی پنڈال میں موجود تھے۔ اس پہلے پیر کے روز صحافیوں اور میڈیا کے عملے کو اس اسٹور کا ایک خصوصی دورہ کروایا گیا تھا۔

بھارت کے اس ایپل اسٹور میں میک بکس، آئی فون، آئی پیڈ اور گھڑیوں سمیت کمپنی کی فی الحال دستیاب تمام مصنوعات کو فروخت کیا جائے گا۔ اس کے علاوہ ایپل آرکیڈ، ایپل ہوم پوڈ، ایپل میوزک، اور ایپل ٹی وی پلس کو بھی شو روم میں پیش کیا جا رہا ہے۔ صارفین کو ضروری مدد فراہم کرنے کے لیے اسٹور کی پہلی منزل پر ایک جینیئس بار بھی ہے۔

اس ریٹیل اسٹور کا افتتاح بھارت میں ایپل کے بڑھتے ہوئے منصوبوں کی نشاندہی کرتا ہے۔ بھارت جیسی اسمارٹ فون کی بڑی مارکیٹ میں کمپنی کا فی الحال تقریباً چار فیصد حصہ ہے جس پر چینی اور جنوبی کوریائی مینوفیکچررز کا غلبہ ہے۔ کمپنی اب اس بات پر توجہ مرکوز کر رہی ہے کہ دنیا کی دوسری بڑی موبائل فون مارکیٹ آخر اس کے لیے کیا ہو سکتی ہے۔ بھارت میں اس نے مینوفیکچرنگ فٹ پرنٹس بھی پھیلانے شروع کیے ہیں۔

فروری میں ٹم کک نے کہا تھا کہ ''بھارت ہمارے لیے ایک بہت ہی دلچسپ مارکیٹ ہے اور اہم توجہ کا مرکز ہے۔ ہم اس مارکیٹ کے حوالے سے اپنی کوششیں بھی تیز کر رہے ہیں۔''