مہاجرین کا بحران: امریکی سرحدی شہر میں ہنگامی حالت کا نفاذ

میکسیکو میں ریو براوو کہلانے والے ریو گرانڈے دریا کو عبور کرنے کے بعد ہیٹی کا ایک خاندان ایل پاسو کی سرحدی باڑ کے ساتھ چل رہا ہے۔ مایوسی اب اس سرحد کے امریکی کنارے پر بھی راج کرتی ہے۔ گزشتہ ہفتے کے اختتام پر ایل پاسو کے میئر نے تارکین وطن کی تعداد کو دیکھتے ہوئے شہر میں ہنگامی حالت کا اعلان کیا۔

ریو گرانڈے نامی دریا میکسیکو اور امریکی ریاست ٹیکساس کے درمیان تقریباً 2,000 کلومیٹر​​طویل سرحد پر واقع ہے۔ ایل پاسو کے میئر آسکر لیزر نے کہا کہ سیاسی پناہ کے متلاشیوں کی بڑھتی تعداد اور سردیوں کے آغاز کے ساتھ ہی درجہ حرارت میں کمی کے باعث "یہ ہنگامی حالت کا اعلان کرنے کا صحیح وقت ہے۔"

ٹیکساس کے ایگل پاس پر لوگوں کو سرحد عبور کرنے سے روکنے کے لیے خاردار تار کی باڑ لگائی گئی ہے۔ سابق صدر ڈونلڈ ٹرمپ کے دور میں متعارف کرائے گئے ٹائٹل۔42 نامی ضوابط کووڈ انیس کی وبائی بیماری کا حوالہ دیتے ہوئے تارکین وطن کو واپس ان کے ملک بھیجنے کی اجازت دیتے ہیں اور اس طرح وہ پناہ کی درخواست دینے سے بھی محروم ہو جاتے ہیں۔

ٹائٹل-42 کے تحت لاکھوں پناہ کے متلاشیوں کو ملک بدر کر دیا گیا۔ بہت سے لوگ سرحدی باڑ کے ساتھ خیموں والےکیمپوں میں رہ رہے ہیں، جیسے وینزویلا کا یہ مہاجر اپنی جوان بیٹی کے ساتھ۔ پناہ کی درخواست کے منتظر ہزاروں افراد میں سے ایک ہے۔

وینزویلا کے اس گروپ کی طرح جنوبی امریکہ کے مہاجرین پیدل آدھا براعظم عبور کر چکے ہیں۔ اپنے راستے میں انہیں دلدلوں، برساتی جنگلوں، پہاڑوں اور صحراؤں کو عبور کرنا پڑتا ہے۔ لیکن جرائم پیشہ گروہ راستے میں ان لوگوں کو دھمکیاں بھی دیتے ہیں۔ اس طرح کے "کارواں" میں وہ کچھ تحفظ کی امید رکھتے ہیں۔

یہ لوگ تیوانا کے قریب سرحدی باڑ عبور کرتے ہوئے ان لوگوں کی یاد مناتے ہیں جو فرار ہونے کی کوشش میں مارے گئے تھے۔ جون میں ٹیکساس میں ایک ٹرک سے 53 تارکین وطن کی لاشیں ملی تھیں، جو ہیٹ اسٹروک اور پانی کی کمی سے ہلاک ہوئے تھے۔ 2014 سے لاطینی امریکہ اور امریکہ کی جنوبی سرحد کے ساتھ لگ بھگ 6500 تارکین وطن کے ہلاک یا لاپتہ ہونے کی اطلاع ہے۔

تھکے ہارے پھر بھی قدرے راحت میں یہ خاندان ابھی ابھی ریو گرانڈے کو عبور کر کے ایل پاسو پہنچا ہے۔ ہنگامی حالت کے اعلان کے ساتھ شہر کے پاس اب کچھ سہولیات کو ہنگامی پناہ گاہوں میں تبدیل کرنے کا اختیار ہے۔ یہ ریاست ٹیکساس سے لوگوں کی دیکھ بھال اور رہائش کے لیے اضافی عملے کی درخواست بھی کر سکتا ہے۔