مہاجرین کی ایک مناسب تعداد قبول کریں گے: آسٹریلوی وزیراعظم

آج پیر کے روز آسٹریلیا کے قدامت پسند وزیراعظم ٹونی ایبٹ نے کہا ہے کہ وہ ایک مناسب تعداد میں مہاجرین کو قبول کریں گے۔ انہوں نے بتایا کہ جنیوا سے اُن کے امیگریشن منسٹر کی واپسی کے بعد وہ منگل کے روز مہاجرین کی حتمی تعداد بارے حکومتی اعلان کر سکتے ہیں۔ آسٹریلوی امیگریشن منسٹر پیٹر ڈُوٹن جنیوا پہنچے ہوئے ہیں اور امکاناً وہ آج پیر کے روز اقوام متحدہ کے ریفیوجیز کے کمشنر سے ملاقات کریں گے۔ ڈُوٹن کی ریفیوجیز کے کمشنر سے ملاقات میں امکاناً مہاجرین کی ممکنہ تعداد بارے کوئی فیصلہ ہو سکتا ہے۔

مرکزی اپوزیشن جماعت لیبر پارٹی نے وزیراعظم کو جنگ زدہ علاقوں میں پیدا انسانی بحران سے نمٹنے کی یورپی کوششوں کا حصہ بنتے ہوئے کم از کم دس ہزار مہاجرین کو قبول کرنے کا مشور دیا ہے۔ اُدھر آسٹریلیا کی گرین پارٹی کے لیڈر رچرڈ ڈی نتالی نے وزیراعظم سے کہا ہے کہ وہ کم از کم بیس ہزار مزید شامی مہاجرین کو پناہ دیں۔

خیال ظاہر کیا گیا ہے کہ آسٹریلیا اقلیتی مہاجرین کو ترجیحی بنیاد پر پناہ دینے کا فیصلہ کر سکتا ہے۔ ٹونی ایبٹ نے اِسی مناسبت سے کہا ہے کہ مہاجرین کے کیمپوں میں اقلیتی کمیونٹیز کی خواتین اور بچوں کو ترجیح دی جائے گی۔ شامی بحران کے شدید اور گھمبیر ہونے پر آسٹریلوی حکومت نے پہلے ہی سن 2017-18 میں 16 ہزار 250 اور سن 2018-19 میں 18 ہزار 750 مہاجرین کو پناہ دینے کا فیصلہ کر رکھا ہے۔

دو روز قبل آسٹریلیا کے وزیراعظم ٹونی ایبٹ نے شام سے مزید مہاجرین کو آسٹریلیا میں پناہ دینے کی ملکی اور بین الاقوامی اپیلوں کو مسترد کر دیا تھا۔ ایبٹ کو کابینہ کی جانب سے بھی مزید شامی مہاجرین کو قبول کرنے کے مشورہ دیا گیا تھا۔ آسٹریلیا کے مہاجرین کے سابق وزیر فلپ روڈک نے آسٹریلوی وزیراعظم کو مشورہ دیا ہے کہ وہ سن1990 کی دہائی میں پیدا ہونے والے کوسووو بحران کے پس منظر میں اقدامات کریں۔ تب بے شمار مہاجرین کو پناہ دی گئی تھی اور وہ جنگ ختم ہونے کے بعد اپنے ملک روانہ ہو گئے تھے۔