مہاجرین کے باعث جرمنی کی آبادی میں ریکارڈ اضافہ

خبر رساں ادارے روئٹرز نے چھبیس اگست بروز جمعہ جرمن حکام کے حوالے سے بتایا کہ سن دو ہزار پندرہ میں جرمنی کی مجموعی آبادی میں سالانہ بنیادوں پر پچھلے پندرہ برسوں کے دوران سب سے بڑا اضافہ ہوا۔ وفاقی شماریاتی ادارے کے مطابق گزشتہ برس جرمنی آنے والے تارکین وطن کی تعداد 1,139,000 رہی، جو سن دو ہزار چودہ کے مقابلے میں دگنی تھی۔ گزشتہ برس جرمنی میں ایک ملین سے زائد مہاجرین اور تارکین وطن داخل ہونے میں کامیاب ہوئے تھے۔

یہ امر اہم ہے کہ جرمن چانسلر انگیلا میرکل کی مہاجر دوست پالیسی اور یورپ کے اس امیر ملک میں سماجی مراعات کے باعث زیادہ تر مہاجرین اور تارکین وطن کی کوشش تھی کہ وہ کسی طرح جرمنی پہنچ جائیں۔ ان مہاجرین میں تنازعات کے شکار ممالک شام، عراق اور افغانستان کے علاوہ دیگر ممالک اور براعظم افریقہ سے ہجرت کر کے آنے والے افراد بھی شامل تھے۔

گزشتہ برس برلن حکومت نے مہاجرین کے لیے فراخدلانہ پالیسی کا اعلان کیا تھا، جس کا عوام نے بھی ساتھ دیا تھا۔ تاہم بعد میں جرمنی میں پرتشدد واقعات کی وجہ سے بہت سے جرمن شہری اب تک میرکل کی مہاجر دوست پالیسی پر شکوک و شبہات کا شکار ہو چکے ہیں۔ اس کے باوجود جرمن چانسلر انگیلا میرکل مصر ہیں کہ برلن حکومت ملک کو درپیش اس بحران پر قابو پا لے گی۔

جرمنی میں وفاقی پارلیمانی الیکشن آئندہ برس ہوں گے۔ اس تناظر میں متعدد جرمن سیاستدانوں نے کہا ہے کہ مہاجرین کی آمد کی وجہ سے جاب مارکیٹ کو سہارا ملے گا کیونکہ جرمنی میں عمر رسیدگی کا شکار ہوتی ہوئی آبادی کی وجہ سے ملازمتوں کے بہت سے مواقع موجود ہیں، جن کا پُر ہونا جرمنی کی بہتر اقتصادیات کے لیے ضروری ہے۔

دوسری طرف ایک حلقے کا یہ خیال بھی ہے کہ جرمنی آنے والے زیادہ تر مہاجرین نہ صرف جرمن زبان سے ناواقف ہیں بلکہ انہیں ملکی معیشت کا حصہ بنانے کے لیے تربیت بھی دینا پڑی گی۔ ایسے حلقوں کے مطابق مہاجرین کو جاب مارکیٹ کا حصہ بنانے کے لیے جرمنی پر اضافی بوجھ پڑے گا اور اس کے لیے کئی سال درکار ہوں گے۔

سن دو ہزار پندرہ میں جرمنی میں ایک لاکھ اٹھاسی ہزار سے زائد افراد کا انتقال ہوا تھا۔ یہ شرح جرمنی میں پیدا ہونے والے بچوں کے مقابلے میں زیادہ ہے۔ تاہم اس کے باوجود گزشتہ برس جرمنی کی مجموعی آبادی میں اضافہ 978,000 ریکارڈ کیا گیا، جو سن انیس سو بانوے کے بعد پہلی مرتبہ ایک صحت مند اضافہ قرار دیا جا رہا ہے۔ سن دو ہزار چودہ میں جرمنی کی آبادی 82.2 ملین ریکارڈ کی گئی تھی۔

جرمن وزارت داخلہ کے مطابق گزشتہ برس مجموعی طور پر 1.1 ملین مہاجرین جرمنی میں پناہ کی غرض سے داخل ہوئے تھے، جن میں سے چار لاکھ اسی ہزار باقاعدہ طور پر درخواستیں جمع کرا چکے ہیں۔ جرمنی میں مہاجرین کی بڑی تعداد میں آمد کی وجہ سے ان کی رجسٹریشن میں بھی مشکلات کا سامنا بھی ہے۔

جرمن حکومت نے ملک میں آنے والے مہاجرین کو ایک نظام کے تحت تمام صوبوں میں تقسیم کیا ہے، جس کے باعث جرمنی کے تمام یعنی سولہ کے سولہ صوبوں کی آبادی میں اضافہ ہوا ہے۔ دو ہزار پندرہ کے اختتام تک 8.7 ملین غیر ملکی ورکرز جرمنی میں مقیم تھے۔ یہ تعداد سن دو ہزار چودہ کے مقابلے میں چودہ فیصد زائد بنتی ہے۔