میونخ اولمپکس، اسرائیلی ٹیم پر حملہ: دوبارہ تفتیش کا اعلان

جرمن حکومت نے نصف صدی سے بھی زائد عرصہ گزر جانے کے بعد میونخ اولمپکس میں اسرائیلی ٹیم پر حملے کی دوبارہ تفتیش کرانے کا اعلان کیا ہے۔ وفاقی جرمن وزیر داخلہ نینسی فیزر نے جمعے کے روز  اپنے ایک بیان میں کہا کہ جرمن حکومت نے سن 1972ء میں میونخ اولمپک گیمز کے دوران اسرائیلی کھلاڑیوں اور قفد کے دیگر ارکان پر حملے کی نئے سرے سے چھان بین کے لیے ایک کمیشن قائم کر دیا ہے۔

انہوں نے کہا، ''بہت سالوں سے ان واقعات کو سمجھنے یا دوبارہ جانچنے اور ان کے بارے میں شفافیت یا ان کے لیے ذمہ داری قبول کرنے کی کمی تھی۔‘‘

یہ منصوبہ اس معاہدے کا حصہ ہے جو جرمنی نے گزشتہ سال متاثرین کے خاندانوں کے ساتھ طے کیا تھا، جس میں اٹھائیس ملین یورو کے معاوضے کی پیشکش بھی شامل ہے۔ یہ معاہدہ ستمبر سن 1972 میں میونخ میں گرمائی اولمپک کھیلوں کے دوران ایک المناک موڑ لینے والے واقعات کے ہمیشہ کے لیے خاتمے کی ایک کوشش تھا۔ یہ واقعات سوگواراسرائیلی خاندانوں اور جرمن حکومت کے درمیان پچاس سالہ طویل تنازعے کی وجہ بنے۔

سن 1972 میں کیا ہوا تھا؟

پانچ ستمبر سن انیس سو بہتر کو بلیک ستمبر نامی جنگجو گروپ سے  تعلق رکھنے والے فلسطینیوں نے جرمن صوبے باویریا کے دارالحکومت میں اسرائیلی اولمپک ٹیم کے کوارٹرز میں گھس کر حملہ کیا تھا۔ انہوں نے ویٹ لفٹر یوزیف رومانو اور ریسلنگ کوچ موشے وینبرگ کو گولی مار کر ہلاک  کر دیا اور نو دیگر اسرائیلیوں کو یرغمال بنا لیا تھا۔

اغوا کاروں نے یرغمال بنائے گئے افراد کے بدلے اسرائیل اور مغربی جرمنی میں قید دو سو چونتیس قیدیوں کی رہائی کا مطالبہ کیا تھا۔ مغربی جرمن حکام کی جانب سے کیے گئے ایک مشکل ریسکیو آپریشن کے دوران تمام نو یرغمالی ہلاک ہو گئے گئے۔ اس آپریشن میں پانچ اغوا کار اور ایک جرمن پولیس افسر بھی مارے گئے۔

دہشت گردی کے اس حملے نے ہولوکاسٹ کے صرف ستائیس سال بعد جرمنی اور اسرائیل کے درمیان ایک گہری دراڑ پیدا کر دی تھی۔ ہولوکاسٹ ميں نازی جرمنوں نے ساٹھ لاکھ سے زیادہ یہودیوں کو قتل کیا تھا۔ ميونخ کے اس واقعے نے اس دور کی مغربی جرمن ریاست کی حکومت کی جانب سے بین الاقوامی کھیلوں کے ان مقابلوں کے انعقاد کے ذریعے اپنے ملک اور عوام کی مثبت تصویر پیش کرنے کی امید کو بھی چکنا چور کر دیا تھا۔

لواحقین کا طویل انتظار

متاثرین کے لواحقین کا طویل عرصے سے مطالبہ تھا کہ جرمن ریاست دہشت گردی کے اس واقعے سے نمٹنے میں ناکامی کی  ذمہ داری قبول کرے اور اس کے متاثرین کو مناسب معاوضہ ادا کرے۔ جرمنی نے گزشتہ برس اس دہشت گردانہ حملے میں مارے جانے والوں کے رشتہ داروں کے لیے اٹھائیس ملین یورو کی اضافی ادائیگی پر اتفاق کیا تھا۔

گزشتہ سال اس حملے کی 50 ویں برسی کے موقع پر منعقدہ ایک تقریب میں جرمن صدر فرانک والٹر اشٹائن مائر نے متاثرین کے لواحقین سے معافی کی درخواست کی تھی۔ گزشتہ دہائی کے دوران ان واقعات کو یاد رکھنے کی کوششیں کی گئی ہیں۔ اس سلسلے میں میونخ کے اولمپک پارک میں ایک یادگار بھی قائم کی گئی۔

ش ر ⁄ ع س، م م (اے ایف پی، روئٹرز،ای پی ڈی)