میڈیسن کا نوبل پرائز: ڈیوڈ جولیئس اور اردم پاتاپوتیان کے نام
4 اکتوبر 2021
نوبل پرائز کمیٹی کے سیکرٹری جنرل تھوماس پیرلمین نے رواں برس کے دنیا میں معتبر ترین قرار دیے جانے والے نوبل انعامات کے پہلے پرائز کا اعلان کیا۔
نوبل کمیٹی کے مطابق ڈیوڈ جولیئس اور اردم پاتاپوتیان کو درجہ حرارت اور لمس یا چھونے کے احساس کے لیے ذمے دار ریسیپٹرز کی دریافت پر یہ انعام دینے کا فیصلہ کیا گیا۔ نوبل کمیٹی نے مزید کہا کہ ان دونوں نے حقیقت میں فطرت کے مخفی راز آشکار کیے ہیں اور ان سے انسانی بقا کو تحفظ حاصل ہوا۔ انہی دونوں سائنسدانوں کو گزشتہ برس ایک اور اہم پرائز کاولی انعام برائے نیورو سائنسز سے نوازا گیا تھا۔
ڈیوڈ جولیئس
نوبل انعام کمیٹی کے مطابق پینسٹھ سالہ ڈیوڈ جولیئس نے مرچ کے ایک جزو کو تلاش کر کے انسانی اعصابی نظام میں موجود حرارت سے جسم کے اندرونی درجہ حرارت کے بارے میں بنیادی معلومات ظاہر کیں۔
طبیعات کا نوبل انعام فلکیاتی دریافتوں کے نام
کیلیفورنیا یونیورسٹی کے برکلے کیمپس سے تعلق رکھنے امریکی سائنسدان ڈیوڈ جولیئس کو سن 2010 میں لائف سائنسز کا شاء پرائز بھی دیا جا چکا ہے۔ وہ مشہور امریکی درسگاہ میساچوسٹس انسٹیٹیوٹ آف ٹیکنالوجی کے فارغ التحصیل ہیں۔
جولیئس نے مرچ میں موجود ایک عام سے جزو کیپسیسین کو دریافت کیا تھا اور اس کی مدد سے انسان میں پائی جانے والی غیر معمولی حرارت کو جاننے میں مدد ملی۔
اردم پاتاپوتیان
اردم پاتاپوتیان نے انسانی درجہ حرارت جاننے کا ایک اور طریقہ وضع کیا، انہوں نے انسانی خلیے سے مکینیکل سینسر کی مدد سے ٹمپریچر معلوم کرنے کا پتہ چلایا۔ نوبل انعام کمیٹی نے ان دونوں طریقوں کو انسانی بقا کے تناظر میں نہایت اہم قرار دیا۔
اسرائیلی اماراتی معاہدہ: ٹرمپ کے لیے نوبل امن انعام کی سفارش
لبنانی نژاد امریکی مولیکولر بیالوجی کے سائنسدان اردم پاتاپوتیان بنیادی طور پر آرمینیائی نسل سے تعلق رکھتے ہیں۔ وہ ان دنوں اسکرِپس ریسرچ ادارے سے وابستہ ہیں۔ وہ کیلیفورنیا یونیورسٹی اور کیلیفورنیا انسٹیٹیوٹ آف ٹیکنالوجی سے تعلیم کے حصول میں وابستہ رہے۔ بنیادی تعلیم انہوں نے لبنانی دارالحکومت بیروت میں واقع امریکی یونیورسٹی سے حاصل کی تھی۔
بقیہ نوبل انعامات
میڈیسن یا فزیالوجی کے بعد فزکس کے نوبل انعام کا اعلان کیا جاتا ہے۔ اس کا اعلان کل منگل پانچ اکتوبر کو کیا جائے گا۔ بدھ چھ اکتوبر کو کیمسٹری کے نوبل انعام یافتگان کے نام سامنے لائیں جائیں گے۔
طب کا نوبل انعام: کالے یرقان کا وائرس تلاش کرنے والوں کے نام
ادب یا لٹریچر کے نوبل انعام کا فیصلہ جمعرات سات اکتوبر کو کیا جائے گا۔ رواں ہفتے کے دوران نوبل انعام کا سلسلہ جمعے کو ختم ہو گا جب امن کے نوبل انعام کا اعلان نارویجین نوبل انسٹیٹیوٹ کرے گا۔
آخری نوبل پرائز کا تعلق اقتصادیات یا اکنامکس کے شعبے سے ہے۔ اس کے انعام کا اعلان اگلے پیر گیارہ اکتوبر کو کیا جائے گا۔ یہ انعام الفریڈ نوبل کی یاد میں سویڈن کے مرکزی بینک نے شروع کیا ہے۔
ع ح/ا ا (اے پی، اے ایف پی)