نئی دہلی:  ’ خوش رہنے‘ کا مضمون اسکولوں کے نصاب میں شامل

نیوز ایجنسی ڈی پی اے کی رپورٹ کے مطابق خوش رہنے سے متعلق اس مضمون کو نوبل امن یافتہ شخصیت اور  تبتی بدھ بھکشوؤں کے روحانی پیشوا  دلائی لامہ نے مرتب کیا ہے۔ دلائی لامہ کا کہنا ہے کہ بھارت دنیا کا وہ واحد ملک ہے جو جدید اور قدیم تعلیمات کو یکجا کر سکتا ہے۔ اُن کے بقول ،’’ یہ تعلیم دنیا میں منفی اور تباہ کن جذبات کے خلاف لڑنے کے لیے بہت ضروری ہے۔ دہلی کے اسکولوں میں متعارف کرائے جانے والے اس مضمون کی تعلیم کا اثر پوری دنیا میں پھیل سکتا ہے۔‘‘

نئی دہلی کے نائب وزیر اعلیٰ منیش سِسودیا کا کہنا ہے کہ نصاب میں روزانہ کا ذہنی مراقبہ، اخلاقیات کی تعلیم اور ذہن کی ورزش شامل ہیں جن کی مدد سے طلباء کو اچھا انسان بننا سکھایا جائے گا۔ سسودیا کے بقول ،’’ اس نصاب سے طلبا کے کردار کو مضبوط کیا جائے گا ان کی ذہنی صحت کو بہتر کیا جائے گا اور انہیں  برداشت سکھائی جائے گی۔ طلبا کو ذہنی دباؤ، اداسی اور بے چینی سے نبرد آزما ہونا بھی سکھایا جائے گا۔‘‘

دہلی بھارت کی وہ پہلی ریاست نہیں ہے جو لوگوں کو خوش رہنا سکھا رہی ہے۔ سن 2016 میں بھارت کی وسطی ریاست مدھیا پردیش نے بھی ’خوشی کا ڈیپارٹمنٹ‘ قائم کیا تھا۔ بھارت کا پڑوسی ملک بھوٹان سن 1970سے اپنے لوگوں کی خوش حالی کو سالانہ ’گروس ہیپی نیس انڈیکیڑ‘ سے ماپ رہا ہے۔

ب ج (ڈی پی اے)