نيو يارک: زرداری اور کلنٹن کے درميان ملاقات

اقوام متحدہ کی جنرل اسمبلی کے اجلاس سے ايک روز قبل ہونے والی پاکستانی صدر کے ساتھ اس ملاقات ميں امریکی وزیر خارجہ نے پاکستان میں امریکا مخالف پرتشدد مظاہروں کے حوالے سے کوششوں کا شکریہ ادا کیا ہے۔ صدر رزداری نے اس موقع پر کہا کہ دونوں ملکوں کے ليے يہ وقت مشکل تھا۔ نيو يارک ميں پاکستانی قونصل خانے کے جاری کردہ بيان کے مطابق زرداری نے مزيد کہا، ’آزادی رائے کے نام پر ہم ايک يا دو لوگوں کو دنيا کا امن خراب کرنے کی اجازت نہيں دے سکتے‘۔

اس سے قبل پاکستانی وزير خارجہ حنا ربانی کھر نے بھی امریکی وزیر خارجہ کے ساتھ اپنی ملاقات کے بعد يہ بيان ديا تھا کہ دونوں ممالک کے درميان تعلقات مثبت جانب رواں دواں ہيں۔

پاکستان کے سينئر صحافی عامر ضياء نے گزشتہ روز ہونے والی اس ملاقات کو دونوں ملکوں کے روابط ميں بہتری کے ليے مثبت پيش رفت تو ضرور قرار ديا البتہ ان کا يہ بھی کہنا ہے کہ اصل مسائل ابھی حل ہونا باقی ہيں۔ ڈوئچے ويلے سے خصوصی گفتگو کرتے ہوئے عامر ضياء کا کہنا تھا، ’اصل چيلينجز يہ ہيں کہ اب بھی امريکا کے کئی حلقوں ميں پاکستان کے حوالے سے اعتماد کی کمی پائی جاتی ہے اور دوسرا يہ کہ امريکا کی جانب سے پاکستان کے شمال مشرقی علاقوں ميں کيے جانے والے ڈرون حملے، پاکستان کی سالميت متاثر کرتے ہيں‘۔

گزشتہ دنوں ہونے والے پرتشدد واقعات، امريکا مخالف مظاہرے اور پاکستانی وزير کی جانب سے ديے جانے والے متنازعہ بيان کے بارے ميں عامر ضياء کا کہنا تھا کہ يہ دونوں ممالک کے حقيقی مسائل نہيں ہيں۔

عامر ضياء کے بقول پاک امريکا تعلقات ميں بہتری کے ليے يہ اہم ہے کہ پاکستان اپنے داخلی مسائل کيسے حل کرتا ہے۔ انہوں نے حکومت کو تنقيد کا نشانہ بھی بنايا اور کہا کہ داخلی مسائل کے حل کے ليے اپنے دور حکومت ميں پاکستان پيپلز پارٹی کی حکومت کا کردار کوئی خاص نہيں رہا۔ انہوں نے کہا کہ آنے والے انتخابات سے قبل سويلين حکومت کو دائيں بازو کی جماعتوں سے بھی چيلنجز کا سامنا ہے، ’پاکستان ميں جو دائيں بازو کی جماعتيں ہيں وہ بہت ہی منظم ہيں اور ان کے اندر پريشان کرنے کا يا ان کی شدت پسند قوتوں سے دہشت گردی کےخطرات ہيں۔ ايسی صورتحال ميں سویلين حکومت ان کے سامنے بے بس ہو جاتی ہے‘۔

نيو يارک ميں ہونے والی اس ملاقات ميں ہليری کلنٹن نے پاکستان کے لیے امریکا کے نئے سفیر رچرڈ اولسن کو بھی متعارف کروایا۔ ان کا کہنا تھا کہ اس بات چیت میں شرکت سے قبل ہی اولسن پاکستان میں ذمہ داریاں سنبھالنے کے حوالے سے حلف اٹھا چکے ہیں۔

رپورٹ: عاصم سليم

ادارت: امتياز احمد