وینزویلا میں امریکی سفارت کاروں کو ملک چھوڑنے کا حکم

وینزویلا کے صدر نکولاس مادورو نے وزارت خارجہ کو ہدایت کی ہے کہ امریکی چارج ڈی افیئرز کیلی کیدرلنگ اور عملے کے دو مزید اہلکاروں کو ملک سے نکال دیا جائے۔ ان کا کہنا ہے کہ ان اہلکاروں نے دائیں بازو کے گروپوں کے ساتھ مل کر ملک میں انتشار پھیلانے اور معیشت کو سبوتاژ کرنے کی سازش کی۔

مادورو نے یہ اعلان پیر کو وینزویلا کے ایک جنوبی علاقے میں قائم فوجی اڈے پر منعقدہ ایک تقریب سے خطاب میں کیا۔ انہوں نے کہا: ’’امریکیو، گھر کی راہ لو، وینزویلا سے نکل جاؤ۔‘‘

امریکی محکمہ خارجہ نے یہ الزامات ردّ کر دیے ہیں۔ محکمہ خارجہ نے ایک بیان میں کہا: ’’ہم نے مادورو کا نشریاتی اعلان دیکھا ہے لیکن ہمیں بے دخلی کا کوئی سرکاری نوٹیفیکیشن موصول نہیں ہوا۔‘‘

بیان میں مزید کہا گیا: ’’ہم وینزویلا کی حکومت کی جانب سے اسے غیر مستحکم بنانے کی سازش میں امریکی حکومت کے ملوث ہونے کے الزامات کو مسترد کرتے ہیں۔ ہم اپنے چارج ڈی افیئرز کیلی کیدرلنگ سمیت سفارت خانے کے تین اہکاروں کے خلاف مخصوص دعووں کو ردّ کرتے ہیں۔‘‘

مادورو نے الزامات کی وضا‌حت نہیں کی۔ خبر رساں ادارے ڈی پی اے نے مقامی ذرائع ابلاغ کے حوالے سے بتایا ہے کہ کیدرلنگ گزشتہ ہفتے ایک جنوبی علاقے میں منعقدہ ایک فورم میں شریک ہوئے تھے۔ اسی علاقے میں وینزویلا کے مرکزی ہائیڈروالیکٹرک پلانٹس واقع ہیں۔

وینزویلا کو بجلی کی قلت کا سامنا رہا ہے۔ گزشتہ ماہ بڑے پیمانے پر ہونے والے ایک بلیک آؤٹ سے ملک کا 70 فیصد علاقہ متاثر ہوا تھا۔ تاہم اپوزیشن اور تجزیہ کاروں کا کہنا ہے کہ اس کی وجہ حکومت کی ناکام پالیسیاں اور ناقص انفراسٹرکچر تھا۔

مادورو نے اوباما انتطامیہ پر الزام لگایا ہے کہ وہ وینزویلا میں لیبیا اور شام کی مانند بدامنی کو ہوا دینا چاہتی ہے۔ انہوں نے اسے ’مداخلت کا نیا ماڈل‘ قرار دیا۔ مادورو کا کہنا تھا کہ فساد شروع کروانے کا منصوبہ بنایا گیا تاکہ مسلح بغاوت کا جواز پیدا کیا جا سکے۔

انہوں نے امریکی سفارت کاروں کی سرگرمیوں کو ’جارحانہ، غیر قانونی اور مداخلت پسندانہ‘ قرار دیا۔ انہوں نے کہا: ’’ثبوت یہاں میرے ہاتھوں میں ہے۔‘‘

تاہم ڈی پی اے کے مطابق انہوں نے کوئی ثبوت نہیں دکھایا۔ وینزویلا اور امریکا کے تعلقات میں کشیدگی پائی جاتی ہے اور چارج ڈی افیئرز کا عہدہ اعلیٰ ترین ہے۔