ٹرمپ بطور صدر: معروف امریکی ستاروں کا امریکا ترک کرنے پر غور
مریکی گلوکاروں، اداکاروں اور موسیقاروں کے حلقے میں ٹرمپ کے خلاف جذبات کا اندازہ اس امر سے لگایا جا سکتا ہے کہ متعدد شخصیات نے صدارتی انتخابات سے پہلے ہی کہہ دیا تھا کہ اگر ٹرمپ صدر منتخب ہوئے تو وہ امریکا ترک کر دیں گے۔
امریکی اداکار ’مٹ ڈیمن‘
مٹ ڈیمن ہالی ووڈ کے مشہور ترین اداکاروں میں سے ایک ہیں۔ انہوں نے امریکی صدارتی انتخابات سے پہلے جرمن داراحکومت برلن کے ایک اخبار کو انٹرویو دیتے ہوئے کہا تھا،’’کیا پتا کہ ٹرمپ کے بطور صدر منتخب ہونے کے بعد میں امریکا چھوڑ کر برلن میں آباد ہو جاؤں‘‘۔ ڈیمن اکثر اپنے بیانات میں ٹرمپ کی مخالفت کرتے رہے ہیں۔
امریکی اداکارہ اور گلوکارہ ’شیر‘
معروف امریکی اداکارہ اور گلوکارہ شیر کا کہنا تھا،’’اگر ٹرمپ انتخابات میں کامیاب ہو گئے تو میں امریکا چھوڑ کر ’’مشتری‘‘ کی جانب کوچ کر جاؤں گی۔
امریکی اداکار ’برائن کرانسٹن‘
مشہور سیریز ’بریکنگ بیڈ‘ کا مرکزی کردار ادا کرنے والے برائن نے کہا تھا،’’ اگر ٹرمپ امریکا کے نئے صدر بن گئے تو وہ امریکا چھوڑ کر مہاجرت اختیار کر لیں گے۔‘‘
کامیڈین اور اسکرپٹ رائٹر ’ایمی شومر‘
امریکا کی خاتون کامیڈین اور اسکرپٹ رائٹر ’ایمی شومر‘ نے کہا تھا کہ اگر ڈونلڈ ٹرمپ صدارتی انتخابات میں کامیاب ہو کر امریکا کے آئندہ صدر منتخب ہو گئے تو وہ امریکا میں نہیں رہیں گی بلکہ امکاناً اسپین جا بسیں گی۔
جانا پہچانا چہرہ ’جان اسٹیورٹ‘
جان اسٹیورٹ امریکی ٹیلی وژن کے ایک مقبول پروگرام ’ڈیلی شوُ‘ کے میزبان رہے ہیں۔ وہ سن 1999 سے سن 2015 تک یہ شوُ کرتے رہے۔ اُن کے بقول،’’ ٹرمپ کی کامیابی کی صورت میں ایک راکٹ لے کر کسی دوسرے سیارے کی طرف چلا جاؤں گا کیونکہ ہمارا سیارہ تو دیوانہ ہو چُکا۔‘‘
کینیڈا سے تعلق رکھنے والی اداکارہ ’نیو کیمبل‘
فلم سیریز ’اسکریم‘ میں اداکاری کا کمال دکھانے والی ’نیو کیمبل‘ نے کہہ دیا تھا کہ ٹرمپ کے صدر منتخب ہونے کی صورت میں وہ اپنے وطن کینیڈا لوٹ جائیں گی۔
اداکارہ اور گلوکارہ ’میلے سائرس‘
میلے سائرس امریکا کے صدارتی انتخابات کی مہم میں ڈیموکریٹ امیدوار ہلیری کلنٹن کے لیے انتھک محنت کر رہی تھیں اور ہلیری کو امریکا کی پہلی خاتون صدر کے طور پر دیکھنا چاہتی تھیں۔ ٹرمپ کی جیت نے ان کے جذبات کو بہت مجروح کر دیا وہ اپنے آنسوؤں پر قابو نا رکھ پائیں اور اُن کا کہنا تھا،’’ میں ٹرمپ کے صدر بننے کے بعد اپنا ملک چھوڑ دوں گی۔‘‘
معروف کامیڈین اور اداکارہ ’چیلسی ہینڈلر‘
چیلسی نے امریکا کے صدارتی انتخابات سے کافی پہلے ہی امریکا سے باہر ایک گھر خرید لیا تھا اور انہوں نے کہا تھا، ’’ میں ڈونلڈ ٹرمپ کے صدر منتخب ہونے کی صورت میں اُن لوگوں سے مختلف قدم اُٹھاؤں گی جو محض امریکا چھوڑنے کی دھمکی دے رہے ہیں۔ میں عملاً یہ کر دکھاؤں گی۔‘‘
امریکی ماڈل ’امبر روز‘
امریکی صدارتی الیکشن سے پہلے ’ڈیلی بیسٹ ویب سائٹ‘ کو ایک انٹرویو دیتے ہوئے ان کا کہنا تھا،’’اگر ہلیری کلنٹن صدر منتخب نہ ہوئیں تو میں امریکا ترک کر کے کینیڈا چلی جاؤں گی۔‘‘