'پاکستان سے آنے والی آلودہ ہوا دہلی کو متاثر کر رہی ہے'

بھارتی ریاست اتر پردیش کی حکومت نے تین دسمبر جمعے کے روز سپریم کورٹ کو بتایا کہ اس کی ریاست میں چلنے والی صنعتوں سے نکلنے والا زہر آلود دھواں دارالحکومت دہلی کی فضا کو مسموم نہیں کر رہا ہے اور دہلی شہر در اصل پاکستان سے آنے والی آلودہ ہوا سے متاثر ہو رہا ہے۔

اس موسم میں دہلی کی فضا عموماً بہت آلودہ رہتی ہے جس کا اس بار سپریم کورٹ نے بھی سخت نوٹس لیا ہے اور اسی حوالے سے اس معاملے پر سماعت ہو رہی تھی۔ کہا جاتا ہے کہ دہلی کی فضا کو خراب کرنے میں پڑوسی ریاستوں کی صنعتوں کا اہم رول ہے جس کا زہر آلود دھواں اور گرد و غبار دارالحکومت دہلی کو بری طرح متاثر کرتا ہے۔

سپریم کورٹ نے کیا کہا؟

اس مقدمے کی سماعت کے دوران دہلی کی پڑوسی ریاست اتر پردیش نے اپنی صنعتوں پر عائد ہونے والے الزامات کا یہ کہہ کر دفاع کیا کہ ہوا کا رخ سمت مخالف میں ہے اس لیے اس کی صنعتوں کا دھواں دہلی کی جانب نہیں جاتا ہے اور یہ ضروری نہیں کہ دہلی میں جو کچھ بھی ہو رہا ہے وہ یو پی کی وجہ سے ہو۔   

ریاستی حکومت کے وکیل رنجیت کمار نے اس کے بجائے اس کا الزام پاکستان پر عائد کرتے ہوئے کہا، "پاکستان کی جانب سے ہوائیں زیادہ آتی ہیں اور وہی دہلی کی فضا کو خراب کر رہی ہیں۔" اس کے جواب میں چیف جسٹس این وی رمنّا نے کہا، "تو آپ چاہتے ہیں کہ پاکستانی صنعتوں پر پابندی عائد کر دی جائے؟"

یو پی حکومت کا کہنا نے کہ اگر  گنے کی ملوں اور دیگر صنعتوں کے چلنے کے اوقات کو محدود کر دیا گيا تو ایسی پابندیوں سے صنعتوں پر برا اثر پڑے گا۔ 

بھارت میں حکومتیں عام طور پر کسی بھی سنجیدہ مسئلے کی ذمہ داری اپنے سر لینے کے بجائے دوسرے فریق پر ڈالنے کی عادی ہیں اور اگر الزام پاکستان پر لگایا جا سکے تو پھر کیا،  کیونکہ اس سے سیاسی فائدہ مفت میں حاصل ہو سکتا ہے۔ بعض مبصرین کے مطابق سپریم کورٹ میں یو پی حکومت نے جو موقف اختیار کیا یہ اس کی واضح مثال ہے۔

دہلی کی بد ترین فضائی آلودگی

گزشتہ کئی برسوں سے نوٹس کیا جا رہا ہے کہ بھارتی دارالحکومت دہلی، لکھنؤ اور شمالی بھارت کے بعض دیگر شہروں میں موسم خزاں کے دوران فضائی آلودگی بہت زیادہ ہوتی ہے۔ اس کے لیے جہاں دہلی میں گاڑیوں کی تعداد کو ذمہ دار بتایا جاتا ہے وہیں پڑوسی ریاستوں کی صنعتوں سے اٹھنے والا دھواں بھی اہم رول ادا کرتا ہے۔

گزشتہ کئی روز سے دہلی اور اس کے قرب و جوار کی فضا اس قدر آلودہ ہے کہ ہر جانب گرد غبار اور دھوئیں کے ایسے بادل چھائے ہوئے تھے کہ جیسے بارش کے سیاہ گہرے بادل ہوں۔ تاہم ایک روز قبل ہلکی بارش سے فضا کچھ صاف ہوئی ہے اور ماہرین کے مطابق اگر مزید بارش ہوئی تو اس سے راحت مل سکتی ہے۔

 اس بار سپریم کورٹ نے بھی فضائی آلودگی کا سخت نوٹس لیا ہے اور اس کی روک تھام کے لیے موثر اقدام نہ کرنے پر دہلی حکومت پر بھی نکتہ چینی کی ہے۔ حکومت نے عدالت کی تنقید کے بعد ہی ایک بار اسکول پھر سے بند کرنے کا فیصلہ کیا ہے جو کورونا کی وبا کی وجہ سے پہلے ہی سے کافی عرصے بعد کھلے تھے۔

 ماحولیات سے متعلق کمیشن نے سپریم کورٹ کو بتایا تھا کہ صاف ستھرے ایندھن سے نہ چلنے والی صنعتوں کو اگر ہفتے کے دوران صرف آٹھ گھنٹے تک کام کرنے کی اجازت دی جائے اور ہفتے کے اواخر میں اگر وہ بند کر دی جائیں تو اس سے فضائی آلودگی میں کافی حد تک قابو پا یا جا سکتا ہے۔

سپریم کورٹ نے اسی سلسلے میں یو پی کی حکومت کو نوٹس جاری کیا تھا تاہم یو پی کی حکومت نے اس کا مداوا کرنے کے بجائے الزام پاکستان پر عائد کر دیا۔