پاکستان میں ایک اور سیاسی جماعت ’عوام پاکستان‘

پاکستان مسلم لیگ کے سابق رہنما شاہد خاقان عباسی اور مفتاح اسماعیل نے آج ہفتہ چھ جولائی کو اسلام آباد میں منعقدہ ایک خصوصی تقریب میں اپنی نئی جماعت کو متعارف کراتے ہوئے اعلان کیا کہ  اس جماعت میں کوئی بھی شامل ہو سکتا ہے۔

شاہد خاقان عباسی اور مفتاح اسماعیل کافی عرصے سے ایک ایسی پارٹی کے قیام کے بارے میں بات کرتے رہے ہیں جو ملک کو شدید بحرانی صورتحال سے نکال سکے۔ گزشتہ ماہ مائیکرو بلاگنگ ویب سائٹ ایکس پر ایک عوام پاکستان نامی جماعت کے اکاؤنٹ سے 'عوام پاکستان، بدلیں گے نظام‘ کے عنوان سے ایک ویڈیو جاری کی گئی۔ اس ویڈیو میں لوگوں کومختلف قومی مسائل کے بارے میں سوالات کرتے دکھایا گیا تھا۔ شاہد خاقان عباسی اور مفتاح اسماعیل دونوں نے اس ویڈیو کو اپنے اکاؤنٹس سے ری شیئر کیا تھا۔

سابق وزیر خزانہ مفتاح اسماعیل کا اسلام آباد میں منعقدہ تقریب میں کہنا تھا کہ اس جماعت کا مقصد تمام پاکستانیوں کو برابری کی بنیاد پر معاشی مواقع فراہم کرنا ہے۔ ان کا کہنا تھا کہ عوام پاکستان موروثی سیاست کو فروغ نہیں دے گی۔

مفتاح اسماعیل کے مطابق، ''اگر آپ اس بات پر یقین رکھتے ہیں کہ ہمیں آگے بڑھنے کا حق حاصل ہے۔۔۔ تو ہمارے ساتھ شامل ہو جائیں اور ہم پاکستان کی تعمیر نو کے لیے آپ کے ساتھ  ہوں گے۔‘‘

ان کا مزید کہنا تھا کہ کوئی بھی سینیئر پارٹی رہنما دو مدتوں سے زیادہ اس جماعت میں خدمات انجام نہیں دے گا۔

ا ب ا/ک م (مقامی میڈیا)