پاکستان میں دہشت گردوں کی فنڈنگ نہیں کر رہے، سعودی عرب

اسلام آباد سے ملنے والی جرمن نیوز ایجنسی ڈی پی اے کی رپورٹوں کے مطابق پاکستانی دارالحکومت میں قائم سعودی سفارت خانے کے منگل دس فروری کو جاری کردہ ایک بیان میں ان الزامات کی تردید کی گئی ہے کہ سعودی عرب پاکستان میں سنی عسکریت پسندوں کو مالی وسائل فراہم کر رہا ہے۔

بیان کے مطابق سعودی عرب اس بارے میں ’شعوری طور پر بڑی احتیاط سے کام لیتا ہے کہ اس کی طرف سے انسان دوستی اور انسانی ہمدردی کی بنیاد پر مہیا کردہ امداد کسی بھی طرح انتہا پسند عناصر کے ہاتھوں میں نہ پہنچے‘۔

ڈی پی اے کے مطابق سعودی سفارت خانے کی طرف سے عوامی سطح پر جاری کیا جانے والا یہ غیر معمولی بیان اس پس منظر میں جاری کیا گیا ہے کہ پاکستانی حکومت کے ایک وزیر نے ابھی حال ہی میں الزام لگایا تھا کہ سعودی حکومت ’پیٹرو ڈالرز کے ڈھیروں‘ کے ساتھ مسلم دنیا میں عدم استحکام کا سبب بن رہی ہے۔

پاکستانی وزیر اعظم نواز شریف کی حکومت میں بین الصوبائی رابطوں کے وزیر ریاض حسین پیرزادہ نے کہا تھا کہ پاکستان میں دہشت گردی کی بڑی وجوہات میں سعودی عرب کی طرف سے مہیا کیے جانے والے نجی مالی وسائل بھی شامل ہیں۔

خبر رساں ادارے ڈی پی اے کے مطابق پاکستان کی وفاقی وزارت داخلہ کا کہنا ہے کہ ملک میں سنی اسلامی اسکولوں اور دینی مدرسوں کی ایک بڑی تعداد کو خلیج فارس کی امیر عرب ریاستوں اور افراد سے فنڈز ملتے ہیں۔ اس حوالے سے یہ خدشات بھی پائے جاتے ہیں کہ یہ رقوم دہشت گرد نیٹ ورک القاعدہ اور طالبان سے تعلق رکھنے والے اسلام پسند شدت پسندوں کے ہاتھوں میں پہنچ جاتی ہیں۔

اس تناظر میں اسلام آباد میں سعودی سفارت خانے نے آج اپنے بیان میں کہا کہ وہ پاکستان میں اسلامی خیراتی اداروں، مسجدوں اور مدرسوں کو براہ راست کوئی مالی وسائل فراہم نہیں کرتا۔ بیان کے مطابق، ’’جب بھی مالی وسائل کی فراہمی کے لیے کوئی درخواست موصول ہوتی ہے، سعودی سفارت خانے کی طرف سے حکومت پاکستان کو اس سے مطلع کر دیا جاتا ہے۔‘‘

اس کے برعکس ڈی پی اے نے اپنی رپورٹوں میں لکھا ہے کہ کئی سکیورٹی تجزیہ نگاروں کو یقین ہے کہ خلیج کے علاقے میں نجی شخصیات کی طرف سے ایک زیر زمین نیٹ ورک کی مدد سے ابھی بھی بڑی بڑی رقوم پاکستان پہنچائی جا رہی ہیں، اور ممکن ہے کہ یہ فنڈز پاکستان میں انتہا پسندی اور دہشت گردی کو ہوا دینے کے لیے استعمال ہو رہے ہوں۔

پاکستانی وزارت داخلہ کے ایک اہلکار کے بقول اسلام آباد حکومت نے گزشتہ برس دسمبر میں پشاور کے آرمی پبلک اسکول پر طالبان کے مسلح حملہ آوروں کے حملے اور اس میں 136 بچوں سمیت قریب ڈیڑھ سو افراد کی ہلاکت کے بعد دہشت گردی کے لیے فنڈنگ کی روک تھام کی کوششوں کے تحت اس بارے میں سعودی عرب، قطر اور بحرین سمیت خیلج کی متعدد عرب ریاستوں کو اپنی تشویش سے آگاہ کر دیا تھا۔

اسی دوران پاکستانی وزارت خارجہ نے کہا ہے، ’’نجی شخصیات اور تنظیموں کی طرف سے نجی اداروں کی غیر رسمی ذرائع سے فنڈنگ کو، چاہے وہ کسی بھی ذریعے یا کسی بھی ملک سے کی جا رہی ہو، دہشت گردی کے خلاف قومی ایکشن پلان کے تحت سخت نگرانی کے دائرہ کار میں لایا جا رہا ہے، تاکہ دہشت گردوں اور دہشت گرد تنظیموں کے لیے فنڈنگ کے ہر امکان کا خاتمہ کیا جا سکے۔‘‘