پاکستانی سرحد کے قریب جھڑپ، پانچ ایرانی اہلکار ہلاک

ایرانی سرکاری ٹیلی وژن کے مطابق لڑائی کا یہ واقعہ پاکستانی سرحد کے قریب ایرانی قصبے سراوان میں پیش آیا ہے۔ یہ قصبہ ایرانی صوبے سیستان و بلوچستان میں واقع ہے۔ قبل ازیں ہلاک ہونے والے ایرانی اہلکاروں کی تعداد چھ بتائی گئی تھی۔ اس واقعے میں دو ایرانی اہلکار زخمی بھی ہوئے ہیں۔

ایران کی ارنا نیوز ایجنسی نے لکھا ہے، ''اتوار کا حملہ ایک دہشت گرد گروپ نے کیا، جو ملک میں دراندازی کی کوشش کر رہا تھا۔‘‘ اس ایجنسی کے مطابق حملہ آور زخمی ہونے کے بعد وہاں سے فرار ہونے میں کامیاب رہے ہیں۔

پاکستان سے سکیورٹی بہتر بنانے کا مطالبہ

ایرانی وزارت خارجہ کے ترجمان ناصر کنانی نے اس حملے کی مذمت کرتے ہوئے کہا،  ''ایران توقع کرتا ہے کہ پاکستان دہشت گرد گروپوں کے خلاف کریک ڈاؤن اور مشترکہ سرحدوں کی حفاظت کو بہتر بنانے کی کوشش کرے گا۔‘‘

ایران سے پاکستان میں ایندھن کی اسمگلنگ میں واضح اضافہ

ابھی تک کسی بھی گروہ نے اس حملے کی ذمہ داری قبول نہیں کی اور نہ ہی ایران نے کسی پر الزام عائد کیا ہے۔ یہ علاقہ ایران کے سب سے کم ترقی یافتہ حصوں میں سے ایک ہے۔ اس خطے کے سُنی اکثریتی باشندوں اور ایران کی شیعہ تھیوکریسی کے درمیان تعلقات ایک طویل عرصے سے کشیدہ چلے آ رہے ہیں۔

ابھی چند روز پہلے ہی پاکستانی اور ایرانی حکام نے اس علاقے میں ایک بارڈر مارکیٹ کا افتتاح کیا تھا، جس کا مقصد دو طرفہ تجارت اور تعلقات میں اضافہ کرنا بتایا گیا تھا۔ پاکستان اور ایران کے درمیان سرحدی علاقے میں پیشین نامی دور افتادہ ایرانی گاؤں میں اس بارڈر مارکیٹ کا افتتاح پاکستانی وزیر اعظم شہباز شریف اور ایرانی صدر ابراہیم رئیسی نے مل کر کیا تھا۔ یہ گاؤں بھی ایرانی صوبے سیستان بلوچستان میں واقع ہے۔

پاک ایران سرحدی علاقوں میں بڑھتی کشیدگی، وجوہات کیا ہیں؟

سن 2012 کے ایک معاہدے کے تحت دونوں ہمسایہ ممالک اپنے مشترکہ سرحدی علاقوں میں ایسی چھ بارڈر مارکیٹیں قائم کریں گے۔ اس اقدام کا مقصد پاک ایران تجارت اور باہمی تعلقات کو مزید وسعت دینا ہے۔

دہشت گرد گروہ پکڑنے کا دعویٰ

دریں اثنا ایران کے وزیر انٹیلی جنس نے کہا کہ اتوار کو ایران کی مغربی سرحدوں سے اسرائیل سے منسلک ایک ''دہشت گرد‘‘ گروپ کو پکڑ لیا گیا ہے۔ نیم سرکاری نیوز ایجنسی نور کے مطابق یہ گروپ ایران میں داخل ہونے کی کوشش کے دوران پکڑا گیا ہے۔ ایران کی مغربی سرحدیں عراق اور ترکی کے ساتھ جڑی ہوئی ہیں۔

 یہ بیان ایک ایسے وقت میں سامنے آیا ہے، جب ایرانی جوہری پروگرام کے حوالے سے ایران اور اس کے حریف اسرائیل کے درمیان کشیدگی عروج پر ہے۔

ا ا / ع ت (اے ایف پی، روئٹرز)