پاکستانی نائب امام کا قتل: منکوحہ جرمن بیوی اور بھائی گرفتار

جنوبی جرمن صوبے شٹٹ گارٹ میں شہر اُلم کی پولیس نے آج پیر اٹھائیس دسمبر کے روز بتایا کہ ٹھیک ایک ہفتہ قبل اکیس دسمبر کی شام قتل کر دیے گئے 26 سالہ شاہد نواز قادری کی موت کی چھان بین کے دوران تفتیشی افسران کو مقتول کی شریک حیات کا بیان بہت مشکوک لگا تھا، جس پر اسی پہلو سے تفتیش کی گئی تو اس کے نتیجے میں ابتدائی طور پر کافی کچھ واضح ہو گیا۔

مشتبہ جرمن ملزمہ مقتول کی منکوحہ

پولیس کے جاری کردہ ایک بیان کے مطابق یہ خاتون ایک جرمن شہری ہے، جس نے مقتول قادری کے ساتھ جرمن قانون کے تحت تو شادی نہیں کی تھی تاہم وہ اسلامی طور پر مقتول کی بیوی تھی کیونکہ دونوں کا نکاح ہوا تھا۔ اس قتل کی تفتیش کے لیے پولیس کی طرف سے قائم کیے گئے خصوصی کمیشن کے ماہرین نے جب مزید چھان بین کی، تو پولیس کا مقتول کی منکوحہ جرمن خاتون اور مقتول کے 25 سالہ پاکستانی بھائی پر شبہ مضبوط ہوتا گیا۔

جرمنی میں پاکستانیوں کی مسجد کے نائب امام کا قتل

اس دوران پولیس نے مقتول اور اس کی شریک حیات کی مشترکہ رہائش گاہ کے علاوہ اسی جرمن صوبے میں مشرقی آلب کاؤنٹی کے علاقے میں ایک ایسے فلیٹ کی تلاشی بھی لی، جہاں مقتول کی منکوحہ جرمن شہری رہتی رہی تھی۔ ان دونوں گھروں کی تلاشی کے دوران حکام کو متعدد ایسے شواہد ملے، جن کی چھان بین کے بعد قانونی نتائج اخذ کرنے کا عمل ابھی جاری ہے۔

عدالت کے حکم پر گرفتاری

تفتئش کے دوران یہ شبہ کافی قوی ہو گیا تھا کہ اس قتل میں ممکنہ طور پر اسی خاتون اور مقتول کے بھائی کا ہاتھ ہے۔ اس پر ایک مقامی عدالت کو ان دونوں مشتبہ ملزمان کی گرفتاری کے لیے وارنٹ جاری کرنے کی درخواست کی گئی، جس کے بعد اب یہ جرمن خاتون اور پاکستانی شہری دونوں باقاعدہ گرفتاری کے بعد پولیس کی حراست میں ہیں۔

اُلم پولیس کے مطابق دونوں مشتبہ ملزمان کو دو مختلف جیلوں میں رکھا گیا ہے اور شاہد نواز قادری کے قتل کے محرکات کے درست تعین کے لیے مزید تفتیش جاری ہے۔ تاہم پولیس کو قوی شبہ ہے کہ یہ قتل مقتول کے خاندان اور اس کے بہت قریبی افراد ہی کا کیا ہوا جرم ہے۔

مقتول کا تعلق پاکستان میں ضلع گجرات سے

شٹٹ گارٹ میں پاکستانی تارکین وطن کی قائم کردہ مسجد المدینہ کے 26 سالہ نائب امام شاہد نواز قادری کو ٹھیک ایک ہفتہ قبل اس وقت سر پر کسی دھاتی سلاخ سے حملہ کر کے قتل کر دیا گیا تھا، جب وہ اپنی منکوحہ جرمن بیوی کے ساتھ شام کے وقت اپنے گھر کے قریب ہی سر کر رہے تھے۔

شاہد نواز قادری کا تعلق پاکستان میں ضلع گجرات سے تھا۔ وہ پیشے کے اعتبار سے ایک ٹیکسی ڈرائیور تھے اور ان کے ان کی منکوحہ جرمن بیوی سے دو بچے بھی ہیں۔ مقتول شاہد نواز قادری گزشتہ تقریباﹰ ایک عشرے سے جرمنی میں مقیم تھے۔