پاکستانی ٹیم کا کرکٹ ورلڈ کپ میں سفر ختم، آگے کیا ہوگا؟

عالمی کرکٹ میں پاکستانی ٹیم کے نام کے ساتھ 'غیر متوقع پرفارمنس‘  کی صفت ضرور جوڑی جاتی ہے۔ ورلڈ کپ سے باہر ہونے کے بعد پاکستانی ٹیم کے کپتان سرفراز احمد اور کوچ مکی آرتھر نے تقریباﹰ ایک جیسے تاثرات کا اظہار کیا ہے۔ وہ سمجھتے ہیں کہ سیمی فائنل میں نہ پہنچنا یقیناﹰمایوس کن ہے لیکن اس کے باوجود پاکستانی ٹیم سر فخر سے بلند کرتے ہوئے عالمی کپ سے رخصت ہو رہی ہے۔

برطانیہ میں جاری عالمی کپ 2019ء میں گرین ٹیم نے اپنی 'غیر متوقع پرفارمنس‘ کی عادت کے مطابق پہلے میچ میں ویسٹ انڈیز کے خلاف ناقص کارکردگی کا مظاہرہ کیا جبکہ اگلے ہی میچ میں میزبان ٹیم انگلینڈ کو شکست سے دوچار کر دیا۔ بعدازاں سری لنکا کے میچ میں بارش نے رنگ میں بھنگ ڈال دیا اور پھر آسٹریلیا اور بھارت جیسے مشکل حریفوں کے خلاف یکایک شکست کا سامنا کرنا پڑ گیا۔

پانچ میچوں کے بعد پاکستانی ٹیم صرف تین پوائنٹ حاصل کرنے میں کامیاب رہی اس طرح سیمی فائنل تک رسائی مشکل میں پڑ گئی تھی۔ عالمی کپ کے اس مرحلے تک کرکٹ ٹیم کی پے در پے شکست نہ صرف شائقین بلکہ مبصرین کے لیے بھی مایوسی کے ساتھ ساتھ غم وغصے کا باعث بنی اور کھلاڑیوں پر بھرپور تنقید کی گئی۔ سوشل میڈیا پر مختلف ویڈیوز میں دیکھا گیا کہ گراؤنڈ میں کھلاڑیوں کو نازیبا الفاظ سے پکارا گیا، ٹوئٹر پر کھلاڑیوں کی نجی تقریبات کی تصاویر شائع کی گئیں۔ ان کے 'پیزا اور برگر‘ کھانے کا بھی مذاق بنایا گیا، لندن کے ایک شاپنگ مال میں کپتان سرفراز احمد پر ایک شخص نے غیراخلاقی طریقے سے تنقید کی۔ اس شدید رد عمل کے بعد ایک بات تو واضح ہوگئی کہ پاکستانی شائقین جیت کے بعد جتنا سراہاتے ہیں، ہار کے بعد اتنا ہیبرا بھلا بھی کہتے ہیں۔

پاکستانی شاہینوں کے پاس ٹورنامنٹ میں آگے جانے کا اب ایک ہی راستہ تھا، یعنی بقیہ چاروں میچز جیتے جائیں۔ گرین ٹیم نے چند کھلاڑیوں کے ردوبدل کے بعد پیچھے مڑ کر نہیں دیکھا اور جنوبی افریقہ، نیوزی لینڈ، افغانستان اور بنگلا دیش کے خلاف چاروں میچز میں کامیابی حاصل کر لی۔ اس طرح مجموعی گیارہ پوائنٹس حاصل کر کے پاکستان ٹیم پانچویں پوزیشن حاصل کرنے میں کامیاب تو ہو گئی لیکن ناقص نیٹ رن ریٹ کے باعث سیمی فائنل تک نہیں پہنچ سکی۔

ورلڈ کپ میں پاکستان کے لیے بابر اعظم کل 474 رنز بنا کر ٹاپ اسکورر رہے جبکہ محمد عامر نے 17 وکٹیں حاصل کیں۔ علاوہ ازیں حارث سہیل، عماد وسیم اور شاہین شاہ آفریدی کی کارکردگی بھی نمایاں رہی۔ کوچ مکی آرتھر نے ورلڈ کپ کے آخری میچ کے بعد رپورٹرز کو بتایا کہ پاکستانی ٹیم میں زیادہ تر کھلاڑی پہلی مرتبہ ورلڈ کپ کھیل رہے تھے اور یہ نوجوان کھلاڑی پاکستان کا مستقبل ہیں۔

دوسری جانب پاکستان کے سابق کپتان شعیب ملک نے بھی ورلڈ کپ کے بعد ریٹائرمنٹ کا اعلان کرتے ہوئے پاکستان کرکٹ کی انتظامیہ کو یہ ہدایت ضرور کی ہے کہ ورلڈ کپ کے بعد جس کو بھی کپتان بنایا جائے اس کو کم از کم دو سال کا عرصہ فراہم کیا جائے۔ تاہم پاکستان کرکٹ کی تاریخ کے مطابق ماضی میں شاید ہی ایسا کوئی ورلڈ کپ گزرا ہو، جس کے بعد کپتان تبدیل نہ کیا گیا ہو۔ اس مرتبہ امید کرتے ہیں کہ ماضی کے برعکس کپتان سرفراز احمد کی قیادت میں اس نوجوان ٹیم کو مزید موقع فراہم کیا جائے تاکہ مستقبل میں پاکستانی کرکٹ ٹیم کی پرفارمنس میں بہتری آ سکے۔