پاکستانی کھلاڑیوں کا وطن واپسی پر پرتپاک استقبال

سرفراز احمد نے اپنے فیس بک پیج پر اپنے ان ہزاروں مداحوں کی تصاویر شیئر کی ہیں جو کئی گھنٹے ان کے گھر کے باہر سرفراز احمد کا انتظار کر تے رہے۔ نیوز ایجنسی روئٹرز کے مطابق کراچی میں پاکستانی کرکٹ ٹیم کے کپتان کے گھر کے باہر  رات سے ہی ان کے مداح ان کا انتظار کرنا شروع ہو گئے تھے۔ کئی افراد نے سرفراز احمد  کےگھر کے باہر کی گلی کو خوب سجایا بھی۔

سرفراز احمد کو اپنی گاڑی سے اتر کر گھر پہنچنے میں آدھے گھنٹے سے بھی زیادہ وقت لگا کیوں کہ ہر شخص فاتح کپتان کو قریب سے دیکھنا چاہتا تھا۔ کئی لوگوں نے اپنے بچوں کو کندھوں پر اٹھایا ہوا تھا تاکہ بچے سرفراز احمد کی  ایک جھلک دیکھ سکیں۔

پاکستانی کرکٹ ٹیم کے کپتان کے فیس بک پیج پر شائع ایک ویڈیو میں دیکھا جا سکتا ہے کہ سرفراز احمد اپنے گھر کی بالکونی پر کھڑے ہیں، انہوں نے چیمپئنز ٹرافی اٹھائی ہوئی ہے اور وہ زور سے ’پاکستان زندہ باد‘ کا نعرہ لگا رہے ہیں اور ان کے نعرے میں نیچے کھڑے ہزاروں افراد شامل ہیں۔ اس موقع پر سرفراز احمد کا کہنا تھا،’’ یہ ٹرافی آپ کی ہے اور اسے ہم نے آپ کی وجہ سے جیتا ہے۔‘‘

روئٹرز کے مطابق چیمپئنز ٹرافی کے مقابلے میں ’پلئیر آف دی ٹورنامنٹ‘ کا اعزاز حاصل کرنے والے حسن علی اور ان کے ساتھ فہیم اشرف، بابر اعظم اور احمد شہزاد لاہور ائیر پورٹ پہنچے تھے جہاں انہیں پنجاب کے وزیر اعلیٰ کی جانب سے پھولوں کا گلدستہ پیش کیا گیا۔ سکیورٹی وجوہات کی بنا پر شہباز شریف ان کھلاڑیوں کا استقبال کرنے ائیر پورٹ پر نہیں پہنچ پائے تھے۔

حسن علی کے مداحوں نے ان کی گاڑی پر پھول کی پتیاں پھینک کر ان کا استقبال کیا۔ اسی طرح فائنل میچ کے ’مین آف دی میچ‘ کا اعزاز پانے والے فخر زمان کا پشاور میں شاندار استقبال کیا گیا۔ اسلام آباد ائیر پورٹ پر عماد وسیم، شاداب خان اور جنید خان کے لیے اسلام آباد پولیس کی جانب سے ’گارڈ آگ آنر‘ پیش کیا گیا۔