پورا گرین لینڈ خرید لینے پر غور کریں، ٹرمپ کا مشیروں کو حکم

امریکی اخبار وال سٹریٹ جرنل کے مطابق صدر ڈونلڈ ٹرمپ نہ صرف اپنے قریبی مشیروں کو متعدد مرتبہ یہ کہہ چکے ہیں بلکہ کئی مواقع پر ان مشیروں نے اس امکان پر غور بھی کیا ہے کہ آیا امریکا کو گرین لینڈ، جو دنیا کا سب سے بڑا جزیرہ ہے، ڈنمارک سے باقاعدہ طور پر خرید لینا چاہیے۔

دوسری طرف نیوز ایجنسی اے پی کے مطابق ڈنمارک نے اس سوچ کو 'اپریل فول‘ کے طور پر کیا جانے والا مذاق قرار دے کر مسترد کر دیا یے۔

اس بارے میں وال سٹریٹ جرنل نے جمعرات پندرہ اگست کو نام ظاہر کیے بغیر وائٹ ہاؤس میں امریکی صدر کے مشیروں کا حوالہ دیتے ہوئے لکھا کہ صدر ٹرمپ نے، جو اپنی نجی زندگی میں جائیداد کی خرید و فروخت کرنے والے ایک ارب پتی بزنس مین ہیں، اس سلسلے میں اپنے قریبی رفقاء سے کہا کہ وہ 'اس بات کا جائزہ تو لیں‘ کہ امریکا دنیا کا یہ سب سے بڑا جزیرہ پورے کا پورا ہی خرید لے۔

تین چوتھائی حصہ برف سے ڈھکا ہوا

گرین لینڈ کے رقبے کا تین چوتھائی حصہ برف سے ڈھکا ہوا ہے اور ڈونلڈ ٹرمپ نے، جو ستمبر میں ڈنمارک کا ایک دورہ بھی کرنے والے ہیں، اپنے مشیروں سے کہا کہ وہ اس پہلو سے سوچیں کہ آیا امریکا کے لیے اس پورے جزیرے کو حاصل کر لینا اچھی بات ہو گی۔ تاہم بظاہر ایسے کوئی آثار نہیں ہیں کہ صدر ٹرمپ کے ڈنمارک کے آئندہ دورے کے دوران مذاکرات کے ایجنڈے میں اس جزیرے کی ممکنہ فروخت بھی شامل ہو گی۔

وال سٹریٹ جرنل کے مطابق صدر ٹرمپ نے نہ صرف اس بارے میں کئی موقعوں پر قدرے سنجیدگی سے اپنی سوچ کا اظہار کیا بلکہ ذرائع نے یہ بھی بتایا کہ گرین لینڈ میں امریکی صدر کی دلچسپی کی وجہ اس ج‍زیرے پر پائے جانے والے قدرتی وسائل اور اس کی بہت اہم سیاسی جغرافیائی حیثیت بھی ہو سکتی ہے۔

گرین لینڈ میں قائم امریکی فضائی اڈہ

اخبار کے مطابق ہو سکتا ہے کہ صدر ٹرمپ کے اس خیال کے پیچھے ان کی آرکٹک کے علاقے میں امریکی فوجی موجودگی بڑھانے کی خواہش بھی ہو۔ اب تک ٹُھول کا فضائی اڈہ ہی امریکا کا وہ فوجی علاقہ ہے، جو زمین کے سب سے شمالی حصے میں قائم ہے۔ یہ امریکی ایئر بیس گرین لینڈ جزیرے کے جنوب میں ایک جزیرہ نما پر واقع ہے۔

وال سٹریٹ جرنل نے یہ بھی لکھا ہے کہ صدر ٹرمپ کی طرف سے گرین لینڈ کو خریدنے کی بات کرنا اپنی نوعیت کا کوئی پہلا واقعہ نہیں ہے۔ اس سے قبل 1946ء میں بھی امریکا نے پہلے تو اس بات پر غور کیا تھا کہ وہ الاسکا کے ایک حصے کے بدلے آرکٹک کے جزیرے گرین لینڈ کا ایک حصہ حاصل کر لے۔ پھر واشنگٹن نے ڈنمارک کو باقاعدہ طور پر یہ پیش کش بھی کر دی تھی کہ وہ گرین لینڈ 100 ملین ڈالر (تقریباﹰ 90 ملین یورو) کی قیمت پر امریکا کو بیچ دے۔

گرین لینڈ بہت اہم کیوں؟

گرین لینڈ نہ صرف دنیا کا سب سے بڑا جزیرہ ہے بلکہ یہ شمالی بحر اوقیانوس اور بحیرہ شمالی کے درمیان بھی واقع ہے اور اس کا زیادہ تر انتظام وہاں کی مقامی حکومت کے پاس ہے۔ اس کے خارجہ امور، دفاع اور مالیاتی پالیسی سے متعلق فیصلے تاہم اس کے مالک ملک ڈنمارک کی طرف سے کوپن پیگن میں کیے جاتے ہیں، جو اس کے بجٹ کا ایک بڑا حصہ بھی ادا کرتا ہے۔

دو ملین مربع کلومیٹر رقبے پر پھیلے ہوئے گرین لینڈ کی آبادی صرف 57 ہزار ہے، جس میں سے اکثریت کا تعلق قدیم مقامی باشندوں کی اِنّوئیٹ آبادی سے ہے۔ سائنسدانوں کے مطابق گرین  لینڈ کو عالمی سطح پر ماحولیاتی تبدیلیوں کے شدید اثرات کا سامنا بھی ہے۔

برف کی تین کلومیٹر موٹی تہہ

گرین لینڈ کے تقریباﹰ پونے آٹھ لاکھ مربع میل رقبے میں سے تین چوتھائی علاقے پر برف کی تقریباﹰ تین کلومیٹر موٹی ایک ایسی تہہ بھی پائی جاتی ہے، جو پگھل رہی ہے۔ ماحولیاتی ماہرین کا خیال ہے کہ یہ خطرہ بھی ہے کہ برف کی اتنی موٹی تہہ کے پگھل جانے سے دنیا کے بہت سے ساحلی علاقے کسی دن سمندری پانیوں میں ڈوب بھی سکتے ہیں۔

ابھی گزشتہ ماہ جولائی میں ہی اس برفانی تہہ کا اتنا بڑا حصہ پگھلتے ہوئے بہہ کر سمندر میں پہنچ گیا تھا، کہ اس کا وزن تقریباﹰ 12 ارب ٹن بنتا تھا۔

م م / ع ح / اے پی، ڈی پی اے