پولنگ کا وقت ختم، کئی جگہ ووٹرز ووٹ نہ ڈال سکے

ڈی ڈبلیو کے نامہ نگاروں کے مطابق پولنگ کا وقت ختم ہونے کے باوجود پولنگ اسٹیشنوں کی حدود کے اندر موجود افراد کو ووٹ ڈالنے کا حق دیا جا رہا ہے۔ تاہم کئی حلقوں میں بعض افراد ایسے بھی تھے جو مقررہ وقت پر پولنگ اسٹیشنوں کے اندر داخل نہ ہو سکے اور یوں اپنے ووٹ کا حق استعمال کرنے سے محروم رہ گئے۔

پاکستان: حالیہ تاریخ کے سب زیادہ متنازعہ انتخابات کا دن

پاکستان: پولنگ جاری، موبائل سروس عارضی طور پر معطل

لاہور میں موجود ہمارے نمائندے تنویر شہزاد کے مطابق لاہور کے مختلف پولنگ اسٹیشن پہنچنے والے ووٹرز کی تعداد مختلف رہی۔ تاہم پولنگ اسٹیشنوں کے باہر لگی طویل قطاروں سے اندازہ ہوتا ہے کہ اس مرتبہ ووٹنگ ٹرن آؤٹ گزشتہ انتخابات کے مقابلے میں نستباﹰ زیادہ رہا۔

قبل ازیں خیال کیا جا رہا تھا کہ پولنگ کے لیے وقت میں کچھ اضافہ کر دیا جائے گا تاہم پاکستان الیکشن کمیشن نے یہ وقت ختم ہونے سے پہلے ہی اس بات کا اعلان کر دیا تھا کہ وقت میں اضافہ نہیں ہو گا۔

لاہور کے مختلف پولنگ اسٹیشنوں کے باہر ووٹنگ کا وقت ختم ہونے کے باوجود بڑی تعداد میں ووٹرز موجود تھے۔

ان انتخابات کے لیے پاکستان کی کُل 241 ملین کی آبادی میں سے 128 ملین کے قریب افراد حق رائے دہی کے اہل تھے۔ ان انتخابات میں ملک کی قومی اسمبلی میں پہنچنے کے لیے انتخابات لڑنے والے امیدواروں کی تعداد 5,121 ہے، جبکہ صوبائی اسمبلیوں کے لیے مجموعی طور پر امیدواروں کی تعداد 12,695۔

خیال رہے کہ قومی اسمبلی کی کُل 336 نشستوں میں سے 266 کا فیصلہ براہ راست ووٹنگ سے ہونا ہے جبکہ 70 نشستیں خواتین اور اقلیتوں کے لیے مختص ہیں۔ ان میں سے 60 خواتین اور 10 اقلیتی برادری کے لیے مخصوص ہیں۔

جن پولنگ اسٹیشنوں پر ووٹنگ کا سلسلہ مکمل ہو گیا ہے وہاں ووٹوں کی گنتی کا سلسلہ شروع ہو گیا ہے۔ پاکستانی الیکشن کمیشن کی طرف سے جاری کردہ انتخابی ضابطہ اخلاق کے مطابق ملکی میڈیا شام چھ بجے سے پہلے کسی ابتدائی یا غیر حتمی انتخابی نتیجے کا اعلان نہیں کر سکتا۔