پولیس کے ذریعے نفاذِ اسلام کا حامی نہیں ہوں، ایرانی صدر

تہران سے پیر چار مئی کے روز ملنے والی نیوز ایجنسی اے ایف پی کی رپورٹوں کے مطابق صدر روحانی نے آج ملکی دارالحکومت میں ایرانی اساتذہ سے خطاب کرتے ہوئے کہا کہ پولیس کا یہ کام تو ہے کہ اس کے پاس ’ہتھکڑیاں اور پستول‘ ہوں لیکن پولیس اہلکاروں کا کام یہ نہیں ہوتا کہ وہ مذہبی قیادت کی طرح کا کردار ادا کریں۔

اے ایف پی نے لکھا ہے کہ اپنے اس بیان کے ساتھ حسن روحانی نے ملک میں نظر آنے والی ان کوششوں سے دانستہ دوری اختیار کر لی ہے، جن کے تحت مذہبی امور میں قانون نافذ کرنے والے اداروں کو بھی شامل کر نے کی حمایت کی جا رہی ہے۔

اس بارے میں اے ایف پی نے اپنے ایک جائزے میں لکھا ہے کہ صدر حسن روحانی کو ابھی گزشتہ ہفتے ہی اس وجہ سے اسلامی جمہوریہ ایران کی قدامت پسند مذہبی قیادت اور سخت گیر سیاسی سوچ کے حامل ارکان پارلیمان کی طرف سے تنقید کا سامنا کرنا پڑا تھا کہ وہ مسلسل اس بات پر روز دیتے آئے تھے کہ مذہبی معاملات میں پولیس کا کوئی کردار نہیں ہونا چاہیے۔

اس تناظر میں حسن روحانی نے آج اساتذہ کے ایک اجتماع سے خطاب کرتے ہوئے کہا، ’’آج اگر ہم انہیں (پولیس کو) یہ کہیں کہ ان کی حیثیت کسی دینی مدرسے کی سی ہے اور وہ اپنے طور پر اسلام کی تشریح کر سکتے ہیں، تو نتیجہ بدنظمی اور انتشار کی صورت میں نکلے گا۔‘‘

اس موقع پر ایرانی صدر نے مزید کہا، ‘‘اسکولوں، یونیورسٹیوں اور تمام دینی تعلیمی اداروں کے اساتذہ کا لازمی مشن یہ ہے کہ وہ اسلام کو بہتر طور پر سمجھیں اور اس کی بہتر تفہیم کے لیے کوشاں رہیں۔ اسلامی تعلیمات کو تفہیم، وضاحت اور ان کا پھیلاؤ سب کی ذمہ داری ہے۔ آپ کسی ایک ادارے کو یہ نہیں کہہ سکتے کہ اسلام کی وضاحت وہ کرے۔‘‘

ایرانی صدر روحانی نے گزشتہ برس ایک ایسے مجوزہ قانونی مسودے کی مخالفت بھی کی تھی، جس کے تحت پولیس اور رضاکار ملیشیا گروپوں کو یہ اختیارات دیے جانا تھے کہ وہ ایرانی معاشرے میں خواتین کے لیے پردے کے لازمی قانون پر عملدرآمد کو یقینی بنائیں۔ تب حسن روحانی نے کہا تھا، ’’ہمیں برائی کی روک تھام کے لیے ’برے حجاب‘ کے مسئلے کو اپنی توجہ کا حد سے زیادہ مرکز بنانے سے گریز کرنا چاہیے۔‘‘ بعد ازاں ایران میں کسی بھی قانون سازی سے پہلے اس پارلیمانی مسودے کو غیر آئینی قرار دے دیا گیا تھا۔

حسن روحانی 2013ء میں زیادہ قدامت پسند محمود احمدی نژاد کے جانشین کے طور پر ایرانی صدر منتخب کیے گئے تھے۔ قدرے اعتدال پسند روحانی کو کئی مختلف امور پر سخت گیر سیاسی اور مذہبی حلقوں کی طرف سے مزاحمت کا سامنا ہے، جن میں روحانی کی ایران کے متنازعہ ایٹمی پروگرام سے متعلق عالمی طاقتوں کے ساتھ کسی معاہدے تک پہنچنے کی کوششیں بھی شامل ہیں۔