ڈرون حملوں کے خلاف اسلام آباد میں گرینڈ جرگہ

جمعے کے روز سے ایک مقامی ہوٹل میں منعقدہ اس جرگے کی صدارت تحریک انصاف کے سربراہ عمران خان نے کی جبکہ شرکاء میں بڑی تعداد قبائلی عمائدین کی تھی۔ اس جرگے کی خاص بات عمران خان کی سابقہ اہلیہ جمائما خان کی موجودگی تھی۔ عمران خان کا کہنا تھا کہ جمائما معصوم قبائلی بچوں اورعورتوں کے ساتھ اظہار یکجہتی کے لیے پاکستان آئی ہیں۔ جرگے میں شریک قبائلی عمائدین کا کہنا تھا کہ 2004ء سے شروع ہونے والے ڈرون حملوں میں عورتوں اور بچوں سمیت سینکڑوں بے گناہ قبائلی بھی مارے گئے ہیں۔

جرگے میں ایک مشترکہ قرارداد بھی منظور کی گئی، جس میں کہا گیا کہ امریکہ پاکستان کے ساتھ حالت جنگ میں نہیں پھر بھی ڈرون حملوں کے نتیجے میں بے گناہ لوگ مارے جا رہے ہیں۔ اس قرارداد میں ڈرون حملوں کا ذمہ دار امریکی سی آئی اے کو قرار دیتے ہوئے اقوام متحدہ کے جنرل سیکرٹری سے اپیل کی گئی کہ وہ امریکی اجارہ داری اور قبائلی عوام کا قتل عام ختم کرائیں۔

تحریک انصاف کے سربراہ عمران خان کا کہنا تھا کہ حکومت پاکستان بھی ان حملوں میں برابر کی شریک ہے ۔ انہوں نے کہا،’’یہ سراسر انسانی حقوق کی خلاف ورزی ہے، پاکستان کی خودمختاری کی خلاف ورزی ہے اور میں ان سب کا ذمہ دار اپنی حکومت کو ٹھہراتا ہوں جنہوں نے ڈرون حملوں کی اجازت دی ہوئی ہے۔ دنیا میں کوئی حکومت اتنی منافقت نہیں کرتی کہ عوام سے جھوٹ بولے کہ ہم ان حملوں کی مذمت کرتے ہیں اور اندر سے ان کو اجازت دے رکھی ہے۔‘‘

جرگے میں شریک برطانوی فلاحی ادارے ’ریپریو‘سے تعلق رکھنے والے امریکی وکیل کلائیو سمتھ کا کہنا تھا کہ وہ امریکی ہونے کی حیثیت سے ڈرون حملوں پر پاکستانی عوام سے معافی مانگتے ہیں انہوں نے کہا کہ امریکہ کا یہ دعویٰ درست نہیں کہ ڈرون حملوں میں صرف شدت پسند مارے جاتے ہیں۔ انہوں نے کہا، ’’امریکہ نے حال ہی میں یہ موقف اختیار کیا ہے کہ ڈرون حملوں میں معصوم لوگ نہیں مارے گئے۔ میں اس بات پر ایک منٹ کے لیے بھی یقین کرنے کے لیے تیار نہیں۔ ہمارا کام اس بات کا تعین کرنا ہے کہ سچ کیا ہے اور پھر ہمارا کام یہ سچ مغربی میڈیا تک پہنچانا ہے۔‘‘

جرگے میں منظور کی گئی مشترکہ قرارداد میں چیف جسٹس سے بھی اپیل کی گئی کہ وہ ڈرون حملوں کی تحقیقات کرائیں اور متاثرہ خاندانوں کو انصاف مہیا کیا جائے۔ جرگے میں ان ڈرون حملوں کے ٹکڑے دکھائے گئے جو امریکہ کی جانب سے مختلف مواقع پر قبائلی علاقوں پر داغے گئے۔

دریں اثناء عمران خان کی سربراہی میں سینکڑوں افراد نے قبائلی علاقوں میں ڈرون حملوں کے خلاف اسلام آباد میں ایک احتجاجی ریلی بھی نکالی۔

رپورٹ: شکور رحیم ، اسلام آباد

ادارت: عصمت جبیں