ڈونلڈ ٹرمپ پر فرد جرم عائد کر دی گئی

منگل یکم اگست کو امریکہ کے وفاقی محکمہ انصاف کی تحقیقات کے نتائج کے مطابق وفاقی گرینڈ جیوری کی طرف سے ڈونلڈ ٹرمپ  پر 2020 ء کے انتخابات کو الٹانے کی کوششوں اور یو ایس کیپیٹل میں 6 جنوری کو ہونے والی بغاوت کے سلسلے میں مجرمانہ الزامات پر فرد جرم عائد کر دی گئی ہے۔ ٹرمپ پر فرد جرم عائد کی جانے پر جو بائیڈن کی طرف سے  خاموشی اختیار کی گئی۔ وائٹ ہاؤس اور صدر جو بائیڈن نے فرد جرم کے اعلان کے بعد کوئی تبصرہ کرنے سے انکار کر دیا اور رپورٹرز کے سوالات کا جواب نہیں دیا۔

یاد رہے کہ وائٹ ہاؤس کی پریس سکریٹری کیرن جین پیئر نے گزشتہ جمعے کو صحافیوں سے بات چیت کرتے ہوئے کہا تھا، ''محکمہ انصاف آزاد ہے۔‘‘ ان کا مزید کہنا تھا،''آپ ہمیں ہر وقت یہ کہتے سنتے ہیں کہ ہم قانون کی حکمرانی پر یقین رکھتے ہیں۔ صدر اس پر بہت ثابت قدم  رہے ہیں۔‘‘

مختلف سیاستدانوں کا رد عمل

امریکی استغاثہ کی طرف سے سابق صدر کے خلاف فرد جرم عائد کیے جانے کے بعد سابق نائب صدر مائیک پینس نے امریکی کیپیٹل ہل پر حملے کے بارے میںٹرمپ  کے اقدامات کی مذمت کی۔ پینس نے کہا کہ یہ الزامات ایک یاد دہانی ہے اس بات کی کہ ''جو بھی اپنے آپ کو آئین سے بالاتر رکھتا ہے اسے کبھی بھی  امریکہ کا صدر نہیں ہونا چاہیے۔‘‘

پینس نے مزید کہا،'' ہمارا ملک ایک آدمی سے زیادہ اہم ہے۔ ہمارا آئین کسی ایک شخص کے کیریئر سے زیادہ اہمیت کا حامل ہے۔‘‘ پینس 2024 ء کے صدارتی  انتخابات میں ریپبلکن پارٹی کے امیدوار کے طور پر نامزدگی کی دوڑ میں شامل ہیں۔

ایک اور جی او پی امیدوار، فلوریڈا کے گورنر رون ڈے سانٹیس نے ٹرمپ پر فرد جرم کے رد عمل میں کہا کہ وہ اُس فیصلے کو روکنے کی کوشش کریں گے جسے وہ ''حکومت کو ہتھیار بنانے‘‘ کے مترادف سمجھتے ہیں۔ ان خیالات کا اظہار کرتے ہوئے ان کا مزید کہنا تھا،'' بطور صدر، میں حکومت کی ہتھیار سازی کو ختم کروں گا، ایف بی آئی کے ڈائریکٹر کو تبدیل کروں گا، اور تمام امریکیوں کے لیے انصاف کا ایک ہی معیار یقینی بناؤں گا۔‘‘ رون ڈے سانٹیس نے مزید کہا کہ انہوں نے ابھی تک فرد جرم نہیں پڑھی ہے۔

ٹرمپ عدالت میں کب پیش ہوں گے؟

ٹرمپ کی جمعرات کو پہلی عدالتی پیشی متوقع ہے۔ اس میں وفاقی استغاثہ کی طرف سےٹرمپ   کے خلاف الزامات کا ایک خاکہ پیش کیا جائے گا اور جج ٹرمپ  کی ضمانت کی شرائط طے کرے گا۔  ٹرمپ ایک درخواست داخل کر سکتے ہیں۔ دریں اثناء ایک جج مقدمے کی سماعت سے پہلے ''پری ٹرائل موشن‘‘ کا ایک شیڈیول تیار کرے گا۔ استغاثہ دستاویزات اور دیگر ثبوت دفاعی وکلاء کے حوالے کرے گا۔ یہ کئی مہینوں تک جاری رہنے والا عمل ہو سکتا ہے۔

آنے والے مہینوں میں ٹرمپ کے وکلاء ممکنہ طور پر فرد جرم کو برخاست کرنے کی تحریک دائر کریں گے تاہم اس کا موقع فوجداری مقدمات میں شاذ و نادر ہی دیا جاتا ہے۔

دونوں فریقین کی جانب سے مقدمے کی سماعت میں ثبوت اور قانونی دلائل کی اجازت کی شکل ترتیب دینے سے متعلق تحریکیں دائر کرنے کا بھی امکان ہے۔

ک م/ ع ت (روئٹرز، اے پی)