کابل: محرم کے ماتمی جلوس پر داعش کا حملہ، آٹھ افراد ہلاک

افغانستان میں طالبان حکومت کے ترجمان ذبیح اللہ مجاہد نے ایک ٹویٹ کر کے بتایا کہ شہریوں کے درمیان موجود ایک ٹھیلے پر دھماکہ خیز مواد نصب کر کے دھماکہ کیا گیا جس کے نتیجے میں آٹھ افراد ہلاک ہو گئے۔ انہوں نے کہا، ''امارت اسلامیہ افغانستان اس بزدلانہ کارروائی کی شدید الفاظ میں مذمت کرتی ہے۔ یہ حرکتیں ان لوگوں کی ہیں جو دین اور ملک کے دشمن ہیں، جو ہماری قوم کی سلامتی اور خوشی نہیں چاہتے۔‘‘

ہم اس دھماکے کے بارے میں کیا جانتے ہیں؟

کابل پولیس کے ترجمان خالد زردان نے ایک بیان میں بتایا کہ سرائے کارز علاقے میں یہ دھماکہ اس وقت ہوا جب افغانستان میں اہل تشیع برادری کے لوگ محرم کی یاد منا رہے تھے۔

انہوں نے بتایا کہ بم حملے میں آٹھ افراد ہلاک اور 18 دیگر زخمی ہوگئے، ان میں سے بعض کی حالت نازک ہے۔ انہوں نے مزید بتایا کہ  دھماکہ خیز مواد سبزیوں سے لدے ایک ٹھیلے میں نصب تھا جسے ایک ایسے علاقے میں کھڑا کیا گیا تھا جہاں سے مقامی افراد روزانہ کھانے پینے کی اشیا خریدتے تھے۔

خالد زردان نے کہا، ''دشمنوں نے ایک بار پھر متبرک دنوں میں حملہ کیا ہے اور بے گناہ شہریوں کو ہلاک کیا ہے۔‘‘ انہوں نے بتایا کہ سکیورٹی ٹیمیں مجرموں کو تلاش کرنے کی کوشش کر رہی ہیں۔

یہ حملہ عاشورہ سے چند روز قبل مغربی کابل کے اس محلے میں ہوا جہاں زیادہ تر شیعہ ہزارہ برادری کے لوگ آباد ہیں۔

داعش نے ذمہ داری قبول کی

عسکریت پسند گروپ داعش نے اپنے ایک ٹیلی گرام چینل پر کہا کہ اس کے جنگجوؤں نے 'بم دھماکہ' کیا۔

گوکہ طالبان کے اقتدار میں آنے کے بعد ایسے حملوں کی تعداد میں کمی آئی ہے لیکن داعش کی جانب سے اہل تشیع افراد کو نشانہ بنانے کا سلسلہ جاری ہے۔ داعش نے دعویٰ کیا کہ اس تازہ حملے میں کم از کم 20 افراد ہلاک ہوئے ہیں۔

طالبان کے ایک اعلیٰ سکیورٹی افسر نے، اپنا نام ظاہر نہ کرنے کی شرط پر، بتایا کہ دھماکے میں 50 سے زائد افراد زخمی اور ہلاک ہوئے ہیں۔ ان میں خواتین اور بچے شامل ہیں۔ انہوں نے کہا کہ ہلاک ہونے والوں کی تعداد میں اضافہ ہوسکتا ہے کیونکہ بہت سے زخمیوں کی حالت نازک ہے۔

امریکہ کے خلاف مظاہرے

دریں اثنا جمعے کی نماز کے بعد کابل میں امریکہ کے خلاف مظاہرے ہوئے۔ مذہبی علماء اور دانش وروں نے گزشتہ دنوں امریکی ڈرون حملے میں القاعدہ کے سربراہ ایمن الظواہری کی ہلاکت کی مذمت کی۔

مظاہرین نے بینرز اٹھا رکھے تھے جن پر 'امریکہ مردہ باد‘ لکھا ہوا تھا۔ وہ امریکی صدر جو بائیڈن کے خلاف نعرے بھی لگا رہے تھے۔

واشنگٹن کا کہنا تھا کہ الظواہری کی کابل میں موجودگی امریکہ اور طالبان کے درمیان ہونے والے معاہدے کی خلاف ورزی تھی جب کہ طالبان کا کہنا ہے کہ اسے القاعدہ کے رہنما کی موجودگی کا کوئی علم نہیں تھا۔

 ج ا/ ع ب (اے پی، ڈی پی اے، روئٹرز)