کراچی میں انٹرنیشنل ریسلنگ

کراچی میں بدھ 17 مئی کی شب ہونے والے پرو ریسلنگ مقابلوں میں دنیا بھر سے 19ریسلرز نے رِنگ میں اپنے داؤ پیچ آزمائے۔

ان ریسلنگ مقابلوں کی ایک خاص بات یہ بھی ہے کہ پاکستان آنے والے ان بین الاقوامی پہلوانوں میں چار خواتین ریسلرز بھی شامل ہیں، جن کے درمیان کراچی میں دلچسپ مقابلہ ہوا۔

نمائشی مقابلوں سے قبل تمام ریسلرز کا شاندار استقبال کیا گیا اور رنگ میں ایکشن سے قبل آتش بازی کا مظاہرہ بھی کیا گیا ۔

پاکستان آنے والے پروفیشنل پہلوانوں میں ڈبلیو ڈبلیو ای کے سابق بین البراعظمی چیمپیئنز کارلیٹو اور ویڈ بیرٹ قابل ذکر ہیں۔کارلیٹو نے دو ہزار چار میں امریکی چیمپئن شپ کے اپنے پہلے ہی مقابلے میں جان سینا کو شکست دی تھی۔

کراچی میں ہونے والے ان مقابلوں میں شریک قابل ذکر ناموں میں ٹائینی آئرن اور پاکستانی نژاد فرانسیسی بادشاہ پہلوان خان کا بھی نام شامل ہے۔

افتتاحی مقابلے میں الجزائر سے تعلق رکھنے والے ریسلر یاسین عثمانی نے اٹلی کے فیبیو فیراری کو چت کردیا ، جبکہ اگلی فائٹ میں ایڈم فیلکس نے کامیابی حاصل کی۔

کراچی میں کے ایم سی اسپورٹس کمپلیکس میں ان مقابلوں کا انعقاد ہوا جس کے لیے ٹینس کورٹ پر تین فٹ اُونچا اور بیس بائی بیس کا رِنگ بنایا گیا۔

پاکستانی شائقین کی جانب سے برطانوی ریسلر ٹائنی آئرن کے انداز کو سب سے زیادہ پزیرائی ملی ۔ انہوں نے ایک ساتھ دو پہلوانوں کو پچھاڑ کر مقابلہ اپنے نام کیا۔

پاکستان میں پہلی بار ریسلنگ کے اس سطح کے ہونے والے مقابلے کو دیکھنے کے لیے شائقین کی بڑی تعداد نے دلچسپی دکھائی اور تقریباً چھ ہزار تماشائی ایرینا میں ریسلنگ کے ان مقابلوں سے لطف اندوز ہوئے۔

مقابلے سے قبل ہونے والی ایک تقریب میں تمام غیر ملکی ریسلرز نے پاکستان میں اس قسم کے ایونٹ کے انعقاد کو سراہا اور امید ظاہر کی کہ وہ پاکستان میں ریسلنگ کے شائقین کو ان مقابلوں کے ذریعے بھرپور تفریح فراہم کریں گے۔

پرو ریسلنگ کا دوسرا مرحلہ 19 مئی کو لاہور میں جبکہ تیسرا اور آخری مرحلہ 21 مئی کو اسلام آباد میں ہوگا۔