کرسمس کے رنگ جرمنی میں

مشرقی جرمن صوبے تھیورنگیا کے شہر وائیمار میں پہلا کرسمس بازار سن 1815 میں لگا تھا۔ اِس روایت کو اِس برس بھی ایک بڑے اور شاندار کرمس ٹری کے ساتھ آگے بڑھایا جا رہا ہے۔

اُلم شہر میں دُنیا کے سب سے بڑے کلیسائی مینار کے بالکل سامنے کرسمس سے پہلے کے اِن چار ہفتوں میں ایک نیا شہر آباد ہو جاتا ہے۔ دَس میٹر قطر کا ایک بڑے خیمے میں لوگ قالین پر بیٹھ کر گاؤ تکیوں سے ٹکا کر دیو مالائی کہانیاں سن سکتے ہیں۔

جرمن دارالحکومت برلن میں مختلف مقامات پر 60 کرسمس بازار لگائے گئے ہیں۔ ’جانڈارمن مارکیٹ‘ کے مقام پر لگے کرسمس بازار میں خصوصی اہتمام کیا گیا ہے۔ دہشت گردی کے خوف سے تمام کرسمس بازاروں میں خصوصی حفاظتی انتظامات کئے گئے ہیں۔

اوسنا بروک کے تاریخی مرکزی حصے میں لگنے والا کرسمس بازار متعدد مرتبہ شمالی جرمنی کا سب سے خوبصورت کرسمس بازار منتخب ہو چکا ہے۔ یہاں کرسمس کے چندے کے لئے دُنیا کا سب سے بڑا ٹِن رکھا گیا ہے، جو کرسمس کے خصوصی گیتوں کی دھن پر دن میں کئی مرتبہ گھومتا ہے۔

کولون کے رونکالی چوک میں 22 نومبر ہی سے خوب رونق ہے۔ یہاں اسٹیج پر موسیقی کے پروگراموں کے ساتھ ساتھ رنگا رنگ اسٹالز پر کھانے پینے کی بے شمار چیزیں اور دستکاری کے نمونے بھی موجود ہیں۔

شمالی جرمن شہر ہیمبرگ میں مجموعی طور پر بارہ مختلف مقامات پر کرسمس بازار لگائے گئے ہیں، جہاں پہنچ کر لوگ خود کو ایک افسانوی ماحول میں گھرا ہوا محسوس کرتے ہیں۔

مشیل شٹٹ کے قدیم تاریخی حصے میں جا کر یوں لگتا ہے کہ گویا وقت رُک گیا ہو۔ یہاں تنگ گلیوں میں چھوٹے چھوٹے اسٹالز پر کرسمس کے موقع کے لئے خصوصی تحفے تحائف خریدے جا سکتے ہیں۔

بیلے فیلڈ کے کرسمس بازار میں قدیم اور جدید کا خوبصورت امتزاج ملتا ہے۔ شہر کے وسطی حصے کے کرسمس بازار میں پورے ایک مہینے تک خوب رونق رہتی ہے، جسے لوگ دور دور سے دیکھنے کے لئے جاتے ہیں۔